Mexico lailia lirtheia chetsualna thlengah mi 21 vel an thi niin tual chhung thuneituin a sawi.
Puebla state-a Nilaini tuka Cuacnopalan leh Oaxaca inkar kawngpuia lirthei pathum insutna a thleng niin tual chhung sorkar hotu, Samuel Aguilar Pala chuan a sawi.
Pala-a hian a hmunah mi 18 an thi a, mi dang pathum chu damdawi inah an thi niin a sawi bawk.
Hliam tuar eng emaw zat an awm bawk a, damdawi ina dah ngai pawh an awm nual niin X-ah a tar lang.
Tual chhung chanchinbute chuan lirthei insute hi tanker truck, bus leh van a nih thu an tar lang hlawm.
Mexican chanchinbu, La Jornada chuan cement truck-in van tlan pelh a tumna lamah he chhiatna hi a thleng ta niin a tar lang.
Lehlam hawi zawnga truck a tlan chiah hi an lam pana tlan bus nen an insu ta a, transport van chuan tauh zuiin a hnuai kawr thukah a tla lut a, a kang zui ta niin La Jornada chuan a tar lang.
Tual chhung chanchinbumiin social media-a video a dah chhuahah chuan kawr atang hian meikhu dum tak a chhuak nasa hle a, kawngpui sira tlak dalna pawh a chhe nasa hle tih a lang thei.
Mexico-ah hian tun hnaiah kawngpuia lirthei chetsualna a thleng nasa hle a. February thla pawh khan chhim lama Tabasco-a bus chesualah mi eng emaw zat an lo thi tawh bawk a ni.