AZL: Ruata Chawnghlut lehkhabu ziah ‘Seven Golden Articles Vol-II’ chu nimin khan Information & Public Relations Department Minister Dr Vanlalthlana’n I&PR Auditorium-ah a tlangzarh.
Tlangzarh inkhawmah Dr. Vanlalthlana chuan digital age-a an chen mek laia lehkha phek ngei hmanga thuziak tha tak tak la khawm a, a bua khawr pum tur hian taimakna leh inpekna thuk tak neih a ngaih thu sawiin, Mizo mipui tana tha leh tangkai tur thlangchhuak tur phei chuan ram leh hnam hmangaihna thuk tak neih a tul thu a sawi.
Minister chuan Mizo thu leh hla ziakmite chu an thuziak hmangin Mizo zirlai leh thalaite nun kaihruaitu pawimawh tak an nih thu a sawi a. An thuziak hmang hian ram leh hnam hmangaihna chawinun te, khawtlang nuam siam tur a zo nun ze mawi chawisan te leh, pi leh pute nunzia ziaka vawn nun kawnga thawktu pawimawh tak an nih thu a sawi bawk.
Lehkhabu tlangzarhna hun hi C. Laizawna’n kaihruaiin, Lalrammawia Ngente chuan lehkhabu chhung thu awmte thlirlawkna hun a hmang a. Elizabeth Chawnghlut chuan lawmhu sawina hun a hmang bawk.
‘Seven Golden Articles Vol-II’-ah hian Mizo ziakmi hmingthang hrang hrang ziah article pasarih a awm.