Donald Trump-a chuan Thawhtanni hian Russian President Vladimir Putin-a chu phone-a biain Ukraine-a indo tihtawp chungchang a sawipui dawn tih a sawi a, ‘thisen luanna tihtawp’ a tum thu a sawi.
Truth Social-ah US president hian Putin-a hi chawhma dar 10:00 (India-a zan dar 07:30)-ah a biak tur thu leh Ukrainian President Volodymyr Zelensky leh Nato ram thenkhat hruaitute pawh a be zui dawn tih a sawi.
Russia leh Ukraine hi kum thum hnuah a vawi khat nan Zirtawpni khan Istanbul-ah an inbia a, indo titawp tura inremna lam an hawi lo va, mi tang erawh inthleng an tum.
Trump-a hian Turkey-ah hian Putin-a a tel ve chuan amah pawh a kal tur thu a sawi a; mahse, Russian president hi a tel lo.
A hnuah Trump-a hian indona chu amah leh Putin-a hmaichhana an inbiak atang chauhvin a tawp thei tih a sawi zui.
Kremlin thupuangtu, Dmitry Peskov-a chuan Thawhtannia Putin-a leh Trump-a inbe turin inbuatsaihna a kal mek tih Russian news agency-te a hrilh a. Hruaitu pahnihte hi indo thu-ah hian phone-in an lo inbe tawh bawk.
Trump-a chuan Truth Social-ah, “Ni hlawk tak a chhuah a beiseiawm a, inkahhai pawh a awm ang a. Indona nasa tak a ni a, hetiang hi a thleng tawh tur a ni a, a tawp tur a ni,” a ti.
European hruaitute pawhin Russia hi ni 30 inkahhai pawm turin an nawr reng.
US leh Russian hruaitute hian inkahhai hi an sawi dun ngei rin a ni a, an pahnih inkawmna tur pawh a tel rin a ni.
Moscow hi Trump-a duh aiin an che muang a; mahse, American an inrawlh erawh lawmawm an tih thu Inrinnia US Secretary of State Marco Rubio leh Russian hotu, Sergei Lavrov-a inbiaknaah sawi lan a ni.
Russia hian Ukraine hi February, 2022 khan a rûn a ni.
Istanbul-a an inbiak hnuah khan Ukraine chuan inkahhai vek puan ni se tiin a sawi.
Ukrainian hotu chuan Kremlin hian ‘thil thar leh pawm theih loh an put a, heng zingah hian an ram chhung hmun tam tak atanga Kyiv-in a sipai a hnuh dawh pawh a tel’ niin a sawi a, chu inkahhai rawtnaa an phut niin a sawi.
Russian aiawh hotu, Putin-a thawhpui, Vladimir Medinsky-a chuan inbiakna chu tha an tih thu leh indawr zel pawh an inpeih tih a sawi.
A hnu lawkah Russian drone-in Sumy region-ah mihring phur bus fuhin mi pakua an thi a, Zelensky-a chuan na zawka Moscow hrek a phut thu a sawi zui nghal.