India leh Pakistan inkara inkahhaina kalpui mek chu chhunzawm zel a ni dawn tih Pathianni khan Indian sipai hotuin a sawi.
Nuclear nei inthenawm ram hnih hi May 7 atang khan ni li chhung ramriah inbeiin drone leh missile hmangin an inkap nasa hle a. May 10 tlaiah inkahhai an puang.
Inkahhai puan hnu lawkah hian bawhchhiaah inpuh tawnin ramri hrulah drone leh missile hmanga inkahna a awm leh nia sawi a ni a. May 12 khan a taka inkahhai kengkawh turin indawr nawn lehin hemi hnu atang hian inkahna a awm leh tawh rih lo.
Indian sipai hotu chuan inkahhai hi Pathiannia tawp tura tih ni mah se chhunzawm zel a ni dawn tih a sawi a, “DGMO (Director General of Military Operations) indawrnaah chhunzawm zel tura tih a ni a, tawp chin siam a ni lo,” a ti.
India leh Pakistan DGMO-te hi inbe leh tura indawrna a la awm rih lo bawk.
April 22 khan Indian awp Kashmir-a khualzinte tlawh thin, Pahalgam-ah mi firfiakte chein Indian 25 leh Nepali pakhat an that a. Delhi chuan Pakistan-in a thlawp hel pawl tihah puhin Islamabad chuan pha mah se ram pahnih inkar tichhetu a ni zui ta a ni.
Hemi phuba la hian India chuan April 7 khaw var hma khan Pakistan-in a awp chin Kashmir leh Pakistan ram chhunga helho tawmna nia a sawite chu missile hmangin a kap a, an inchhang zui ta chiam a ni.
Kashmir hi kum 1947-a Britain rorelna atanga chhuaka India leh Pakistan ram a din hnuah an la inchuh ngar ngar a. Vawi hnih anb indo phah tawh a, an ram ve ve-ah chhal mah se tlem ve ve chauh an awp a ni.