Aizawl: MPYCC chuan ZPM party chu kum 2023 MLA inthlanpui neih dawnah BJP-in sum leh paia tanpuiah an puh.
Inrinnia thuchhuah an siamah MPYCC chuan, “Central-a BJP minister-te leh party hruaitute chuan MNF aia ZPM hmanruaa hman an duh avanga kum 2023 MLA inthlana sum leh paia an puih thu langsar takin an sawi. Mizoram BJP hruaitute pawhin heihi a dik tih an sawi,” an ti.
Congress Thalai chuan BJP thiana siam tum leh thawhpuina hming ziak an nih avangin, kum 2023 MLA inthlan vote thlak hnaih tawh takah ZPM MLA candidate-te chu sum leh paiah Mizoram mipui mak tih khawpin an hnianghnar thut a. BJP-in ZPM candidate-te sum leh paia an puih avangin he sorkar hian na taka an thil phut let lian tak an tih hlawhtlin ngam loh avangin, Mizoram hi sum leh paiah hrek a ni mek tih sawiin, “Sum harsatna avangin ruihhlo tawlh a hluar a, Party fund leh party office leina tur sum mamawh tak ZPM party chu an Minister zin haw thlengin Assam Rifle hovin tum hnih an lo ti ding hial a ni,” an ti bawk.
ZPM party chu an insawi angin an awm lo zui zel tih sawiin Congress |halai chuan, “‘Kan danglam bik dawn’ tia inzuar siin, sorkar kal sual tur vengtu tura an zawrh VUC-in MLA hlawh tihpun do tur leh tihpun anih pawha MLA hlawh hlui la tura a ti chungin a vaiin an la a, car pakhat chauh kawl intiam a, CM leh Minister Bangalow cheina senso ti ve lo tura inzuarin, sorkar kal tawhte aia uchuakin mipui pawisa hmangin an che leh si,” tiin, hei hi mipui bumna leh mipui rawkna dik tak zawk chu a ni tih mipuiin lo chhinchhiah turin a ngen, tih an sawi bawk.