AZL: Mizo zinga Mount Everest lawn chhuak hmasa ber, David Zohmangaiha, AMC Ward VXII corporator ni bawkin khawvela tlang sang ber a lawn chhuah champha pualin Inrinni khan Civil Hospital, Aizawlah thisen a pe a. Zotrek Adventure Club Member-ten an adviser tawiawmin thisen an pe ve nghal bawk.
David Zohmangaiha hian kum 2013 khan Mt Everest chu May 18 khan a lawn chhuak a. Kumin hian a champha hi Pathianni a nih avangin Inrinni khan thisen a pe a ni.
David Zohmangaiha hian Covid-19 len lai khan kum hnih thisen a pe thei lo va, chumi bak chu Mt Everest lawn chhuah cham hriatreng nan thisen a pe ziah a. Zotrek Adventure Club-ten an adviser hi an tawiawm ziah bawk.
Mizo zingah Mt Everest lawn chhuak hi David Zohmangaiha bakah mi dang pahnih, Mizo hmeichhe zinga lawn chhuah hmasa ber leh a awm chhun, Lalrintluangi, Dawrpui Vengthar leh Johny Laltlanmawia, Ramhlun North te an awm.
Lalrintluangi hian May 21, 2016 khan a lawn chhuak a, Johny Laltlanmawia hian May 13, 2019 khan a lawn chhuak.