Manchester United neitu pakhat, Sir Jim Ratcliffe-a hausakna chu a tlahniam nasa hle a, tun hnai thla 12 chhung khan a hausakna hi £ tluklehdingawn 6.473 ($ tluklehdingawn 8.6) zetin a tlahniam.
Sir Ratcliffe-a hausakna hi £ tluklehdingawn 23.519 ($ tluklehdingawn 31) vel niin an chhut a, thla 12 chhunga a tlakhniam hnuah hian a hausakna chu £ tluklehdingawn 17.046 ($ tluklehdingawn 22.5) vel niin an sawi.
Kum 72 mi, Ratcliffe hi sumdawng hausa em em a ni a, February, 2024-ah Manchester United-ah 27.7% chanpual a lei a, he mi hnuah hian thuneihna sang zawk a neih chhoh theih phah a. Premier League huanga an chet chhiat ber pawl a ni chho a, hei vang hian an zinkawng a hahthlak hle.
Ratcliffe hian Manchester United tan hian ama pawisa £ maktaduai 300 ($ maktaduai 398) zet chu a hmang tawh a ni.
British billionaire hian thuneihna sang zawk a neih hnuah United chhungah thil a thlak danglam nasa tawh hle a, club chhunga thawktu za chuang zet chu a ban tawh a, ticket man a tisang a, mi nuai khat thut theihna tur stadium thar an ruahman mek bawk a ni.
Sumdawnna lamah Ratcliffe hi a che fuh lo hle a, kum khat chhunga an company sum lak luh aia let nga vela tam leiba an nei a, hei hian a sum dinhmun a tihbuai phah.
A hmaa Britain chhunga pa hausa ber ni thin Sir Jim Ratcliffe hi tunah chuan pasarihnaah a tlahniam a ni.