Khawvel puma infiammi zawng zawng zingah Cristiano Ronaldo chu sum la lut hnem ber niin hetiang dinhmunah hian a zawnin kum thum chu a awm tawh a, a vanglaiin sum la lut hnem ber hi vawi nga a ni ta bawk.
Saudi Arabia club Al Nassr a zawm hnuah Portuguese footballer Ronaldo sum lak luh hi $ maktaduai 275 vel ni tawhin an chhut a. Social media lamah follower a nei hnem hle a, May thla thlengin a follower neih zat hi maktaduai 939 an tling a, hei vang hian khelmual pawn lamah pawh $ maktaduai 15 vel zet a la lut bawk a ni.
Sum hai lut hnem viau mah se Saudi Pro League a zawm hnuah Ronaldo hian trophy lian tham a la lakpui thei rih lo a, hei hi tihpuitlin ngei a tum hle a ni.
Golden State Warriors guard Stephen Curry chu sum lak luh tam lamah hian pahnihna a ni a. March thlaa NBA player zinga vanglaia 3-pointer 4,000 thun thei hmasa ber ni thei hian $ maktaduai 156 vel a la lut a ni.
Boxer rothap, Tyson Fury chu pathumna dinhmun luahtu a ni a, December thlaah khan world heavyweight title chu Oleksandr Usyk hnenah hloh mah se thil dang atanga sum a lak luh that bawk avangin a sum lak luh zawng zawng chu $ maktaduai 146 a la tling tho.
Dallas Cowboys quarterback Dak Prescott chuan $ maktaduai 137 a la lut a, hei vang hian palinaah a awm theih phah a. Hetiang zat a lak luh theih chhan chu record thar siama contract thar ziah man a dawn hnem bakah a contract pawh seina atana a sum lak luh a tam tham vang a ni.
Argentine star Lionel Messi chu panganaah a awm a, nikum lama a lak luh zat $ maktaduai 135 tho a la lut leh a. Major League Soccer club Inter Miami CF a zawm bakah Adidas leh Apple te nen an inthlunzawm tlat a ni.
Los Angeles Lakers forward LeBron James chu paruknaah a awm a, inkhelh a chawlhsan dawn tep tawh a, heti chung hian $ maktaduai 133.8 a la lut thei tho a ni.
Major League Baseball team New York Mets outfielder Juan Soto chu pasarihna niin, a sum lak luh zawng zawng chu $ maktaduai 114 a ni a. Kum 26 mi, Dominican Soto hian kum 15 chhung atan $ maktaduai 765 contract a ziak a, hei hi baseball-ah chuan a lian ber a la ni.
France striker Karim Benzema chu pariatnaah a awm a, Saudi Arabia club Al Ittihad striker hian $ maktaduai 104 a la lut a ni.
Baseball star Shohei Ohtani chu pakuanaah a awm a, a sum lak luh zawng zawng chu $ maktaduai 102.5 niin, a lak luh tam zawk hi MLB team Los Angeles Dodgers a contract a ziah atangin a ni.
Top 10 huanga a hnuhnung berah NBA star Kevin Durant a awm a, Phoenix Suns player sum lak luh zat hi $ maktaduai 101.4 a ni.
- Ronaldo, football: $275m (£206.6m)
- Curry, basketball: $156m (£117.2m)
- Fury, boxing: $146m (£109.7m)
- Prescott, American football: $137m (£103m)
- Messi, football: $135m (£101.4m)
- James, basketball: $133.8m (£105.5m)
- Soto, baseball: $114m (£85.7m)
- Benzema, football: $104m (£78.2m)
- Ohtani, baseball: $102.5m (£77m)
- Durant, basketball: $101.4m (£76.2m)