Aizawl: Mizoram chu ziak leh chhiar thiam vekna state-ah Chief Minister Lalduhoma’n nimin khan a puang.
Thawhlehni tlai dar 4:30 khan Union Minister of State for Skill Development & Entrepreneurship Jayant Chaudhury leh chief minister te chuan Mizoram Fully Literate State a nih puanna leh lawmna hun, Mizoram University Auditorium-ah an hmanpui a. He hunah chief minister chuan Mizoram chu India ram state leh union territory zingah kum 15 chin chung lam ziak leh chhiar thiam vek awmna state hmasa berah a puang a ni.
Sorkar laipuia ministry of education hnuaia Understanding Lifelong Learning for All in Society (ULLAS) hnuaia ziak leh chhiar thiam vekna state ni tur hian state chhung mipui awm zat atanga teha ziak leh chhiar thiam zat chu zaa 95 aia tam nih a ngai a. He tehfung atang hian Mizorama ziak leh chhiar thiam zat chu Periodic Labour Force Survey (PLFS 2023-2024)-ah zaa 98.2 niin, tun hnaia ULLAS hmalaknaa ziak leh chhiar thiam an lo pun tak avangin, ULLAS tehfung atangin Mizoram chu ziak leh chhiar thiam vekna state tia puan theih a lo ni ta a ni.