Mikel Arteta chuan season thara Premier League title an lak theih ngei nan theihtawp an chhuah dawn tih sawiin, Arsenal player-te chuan nipui chawlh pawh an hmang rei dawn lo tih a sawi.
Kum nga leh a chanve chhung Arteta kaihhruaina hnuaia an awm tawh chhungin 2020 FA Cup champion an ni thei a, hei bak hi nomawi an la thei lo.
Champions League semifinal-ah Paris Saint-Germain an hneh ta lo a, Premier League lamah lah Liverpool an champion tawh bawk a, hei vang hian Arsenal hian season thar an nghah leh a ngai ta a ni.
June thlaah khan senior player 10 vel chu Marbella lamah training camp nei turin an chhungte nen an kal a, khatiang khan tih leh an tum nge tum lo tih an zawhna chhangin Arteta chuan, “Kan tum leh chu a nia, player-te zawk hian tih leh an duh a ni. Tunlaiah kar li atanga kar ruk vel awm hahdama a hnua khelmuala tha taka che zui leh thei tura pen chhuah chu thil harsa tak a ni a. Zin kual hrep leh tha taka game 65 khelh theih chu thil theih niin ka hre lo,” a ti.
“Tunah chuan player-te hian mahni tawka a tha thei ang ber nih an duh tawh hlawm a. Kan player-te hian an chhungte bula awm an thlakhlelh ang bawkin an teammate-te nen awmho zel hi an duh a, hetiang rilru an pu hi kan vannei hle. An duhna hmun thlang se, tha taka training neih theih ngei kan tum dawn a ni,” a ti bawk.
February thla atanga an chhawr theih tawh loh, Kai Havertz chu khelmualah a inlan ve leh thei dawn tan a, nipui bazar inhawn hunah pawh an phusa viau tura ngaih niin Real Sociedad atangin Martin Zubimendi chu an la lut thei teuh tawh hle.
Arsenal hian Espanyol goalkeeper Joan Garcia, Athletic Club winger Nico Williams, RB Leipzig forward Benjamin Sesko, Sporting CP striker Viktor Gyokeres bakah Newcastle United striker Alexander Isak te chu an veh nasa hlawm hle niin an sawi.