- K. Hmingthankaia
Tunhma, at deuh lai khan Officer thenkhatin Sawrkar-a an Driver-te an mahni awmpui leh chhiahhlawh chhawra chhawr ching an awm thin. Mahse, tunlai hi chuan mi kan lo changkang ta a, tupawhin mahni tih tur leh tih loh tur, thil mawi leh mawi lo, tihawm leh awm lo hriat nachang kan lo hre ta hle a, tin, mitin hi thil sawisel lamah kan lo huai ta bawk a, drivers leh an pu/pi-te inkar pawh hi a tha ta-in, Office hour leh Sawrkar duty piahlama inchhawr a awm ta meuh lo niin a lang.
At lai Officer ang kha an la awm em, tih hriat tumin, May 2025 chhung khan Sawrkar Department 7 Office-a Drivers room ka kala, a then pawnah a falin ka kawm a, a then a huhoin, a then anmahni bika hruaitute uluk takin ka kawm a ni. Hetia ka tih chhan chu a hnuaia Officer a angte hi kan lo la awm takin ka ti a ni. Officer a chuan:
- Sawrkara a driver chuan, mahni in lamah, a nupui fanaute leh chhungkuaah tunlai chhungtin zingkar buai em em ang hi nei vein, ama fate ngei pawh sikul kal tur buaipui ve a ngai ang tih haider luiin, a tu leh fate sikul kal thlah turin zing dar 7 velah a in-turnup tir thin. Hei hian driverte chhungkuaah manganna leh buaina tam tak thlenin, inhauhna leh thinurna tam tak a hring thin.
- Driver-te chu hlawh tlem zawk leh chhungkaw din tir leh khawsak harsa zawk an nih avangin, office chawlh huna tih tur tam tak hmachhawp an nei ve anga, mihring ve tho an nih angin, an nupui fanau leh an chhungte nen tih tur leh kal duhna an lo nei ve ang tih hriat sak duh miah lova mahni hnaa chhawr ching an awm thin.
- Driver leh an chhungten sawrkar chawlh an lo hisap, an lo thlakhlelh ve em em chu engmah lova chantirin, mahni in saknaah emaw, Aizawl pawna an huana zan riak hiala hruai daih ching an awm thin.
- Officer chu Kohhran tenau deuha hotu lian a nih chuan, office hun piah lam, zing leh zan emaw, office kal loh ni apiang leh, inrinni leh Pathianni hmanga Kohhran thila Aizawl pawna zan riak hiala zinchhuahpui ching an awma, Aizawl chhungah pawh mitthi ral leh kohhran thil leh, inkhawm hruai tur vela driver-te office hour lova chhawr ching an awm thin.
- Chungkaw inhmuh khawm leh chawei khawm hun, sunday-a mahni thil hote tea driver koh bo daih ching an awm thin.
- Officer a chuan a driver chu a nghetlo a la nih avanga khawsak harsa an ni ang tih ngaihtuah ahneka, a nghetlo a nihna tak chu remchang leh vaukhana hmanga, duh duha chhawr ching an awm thin. Hetiang driverte hi an khawngaihthlak tak zet. An pute an hnial chuan thlawn mai an hlau si a, nakina la ngheh ve beiseiin, harsa tak chung pawhin an pute thu chu hlau takin an zawm lo thei lo a ni.
Driver ka kawmte hi chuan khiti ang Officer khi chu an departmenta an awm tawh loh thu leh, felfai taka an awm thu leh, office hour bak an thawh ngai lo thute, meeting leh engemaw vanga haw tlai leh zin changa haw tlai an neih thute min hrilh a ni. Kei pawhin chungte chu sawrkar hnain a kentel vek alawm ka ti.
Mahse, ka driver kawmte hian Officer sikul naupang inhruaitir ching an la awm zeuh zeuh thu leh, a nghet lova thawkte an zuam bik lutuk chu an ngaihmawh hle a, kei pawh uar taka sawi turin min ti a ni. Mahni fate leh chhungkua buaipui hman ve miah lova, chhungtin buai hun lai, zingkara mi fate buaipui chu thalo an ti hle.
Aw le, a chunga ka sawi tak Officer a ang khi chu, heng ka kawm tak driverte awmna department nilo, Mizoram Sawrkar hnuaia khawi department emaw-ah hi chuan an lo la awm ngei niin a hriata, hetiang Officer a te hian mi nun leh mi chhungkuaah buaina leh harsatna tam tak an thlena, inhauhna, thinurna leh inmawhchhiat tawnnate mi chhungkuaah an thlen nasaa, anmahni ngei thlavang pawh an tawng nasa thin tih hriain, mi chan mahni chana dah thiamin lo harhchhuak se tih vanga rawn ziak ka ni e.
Tin, khiti ang Officer leh driver ang khi an lo awm a niha, he thu ziak avanga Officer-in a driver chunga hlei a len a nih chuan, hei aia chiang zawkin ka rawn sawi leh ang.