Aizawl: Urban Development & Poverty Alleviation Department bultumin Aizawl leh district headquarters hrang hrangah AMRUT 2.0 hnuaia thingphun campaign ‘Women for Trees’ kalpui tan.
Nilaini khan UD&PA Diretctor Jacob Lalawmpuia hovin Mizorama ‘Women for Trees’ campaign bultanna pui ber chu Edenthar BSUP, Aizawlah hawnna neih a ni. Campaign hawnna hunah AMRUT 2.0 hnuaia thawktute bakah Deendayal Antyodaya Yojana – National Urban Livelihoods Mission (DAY-NULM) hnuaia Delf-Help Group (SHG) member thahnem tak an thawk chhuak.
Aizawl khawpuia hmun li – BSUP Edenthar, BSUP Durtlang, BSUP Lawipu leh RAY Falkland-ah nimin khan UD&PA Department kaihhruainain SHG member-ten thingphunna hmun tur hi an enfel a, vawiinah enfel hna chhunzawm leh a ni ang.
June thla chhungin thing thahnem tak phun tum a ni. District headquarters dangah pawh he hun hi hman a ni a, UD&PA department thawktute kaihhruainain hmun 46-ah SHG member 518-ten thing eng emaw zat phun turin hma an la a ni.
Khawpui chhungah boruak thianghlim leh tui hna tha zawk neih theihna turin thingphun theihna tura ram awl awm thei apiang – tui hna awmna bul hnai, park, sorkar ram leh a vel, school/college, anganwadi-ah te thingphun campaign hi kalpui tura ruahman a ni. Thingphunte hi a rei lo berah kum hnih khat tal enkawl chhunzawm tur a ni ang.