Aizawl: Mizoram Chief Electoral Officer thar Dr Lalrozama chuan Mizoram CEO kalchhuak ta, Madhup Vyas, tuna ECI-a Deputy Election Commissioner hna chelh mek leh ECI mi pawimawh dangte nimin khan New Delhi-ah a kawm.
Mizoram CEO Dr Lalrozama hian Mizorama election department-in harsatna a neih hrang hrangte leh hmasawn ngaihna laite ECI hotute hnenah a thlen a. District hrang hranga inthlanna hmanrua Electronic Voting Machine (EVM) dahthatna, warehouse thawm that a ngaih thu sawiin, ECI duh dan anga heng warehouse himna atan venghimtu tam zawk dah belh tura police department ngen an nih thu a sawi a. Thawktu indaih lohna sukiang tura hmachhawpte, building hran a neih loh avanga harsatna a tawhte, building hrang neih loh hian inthlan laiin venhimna thlenga nghawng a neih avangin a rang lama building hrang neih a tul thu te a thlen a. Hei bakah Mizoram chhungah media an la neih changtlun tawk loh avangin ECI hmalakna hrang hrang puanzarna kawngah harsatna a awm thin thu a thlen.
ECI hotute chuan Mizoram chhung inthlanah Mizoram People’s Forum (MPF)-in inthlanna thianghlim a awm theih nana an hmalaknate tha an tih thu sawiin, Mizoram chu state ralmuang a nih anga state dangte entawntlak khawpa inthlanna felfai neih a nih thin avangin Mizo mipuite chungah lawmthu an sawi.
ECI chu ‘one nation one election’ kalpui turin a inbuatsaih mup mup thu sawiin, CEO leh election department-a thawktute he hmalakna a hlawhtlin theih nan theihtawpa tan lakpui turin an sawm bawk.
Mizoram CEO Dr Lalrozama hi Ethel Rothangpuii, Joint Chief Electoral Officer, Mizoram-in a tawiawm a ni.