Aizawl: Union Home Minister Amit Shah-a’n Assam Rifles ram chhuahsan tura Mizoram sorkarin building hlui man Rs. nuai 523.04 a pek ve tur chu peksak a inhuam thu Chief Minister Lalduhoma a hrilh.
Zirtawpni khan New Delhi-a cham mek chief minister Lalduhoma’n union home minister a kawm a. An inkawmnaah hian Mizoram chu India rama state ralmuang ber a ni chu chhuanawm a tih thu sawiin Shah chuan, Mizorama remna leh muanna a awm theih nana Lalduhoma’n a lo tawrh tawhna te kha a hriatpui thu leh, hemi hriatpui nan Mizoram sorkar flagship programme Bana Kaih (Handholding scheme) atan Peace Dividend inpek theih a nih leh nih loh te an sawidun niin sorkar thuchhuah chuan a tar lang.
Union home minister chuan Assam Rifles ram chhuahsan tura Mizoram sorkarin building hlui man Rs. nuai 523.04 a pek ve tur pawh peksak a inhuam thu a hrilh a. Airports Authority of India (AAI) kuta Lengpui Airport hlan chungchang pawh sawiin home minister chuan a rang thei ang bera chin fel a tum thu a lo hrilh a. Mizoram DGP atana David Lalrinsanga, IPS, a rang lama dah a nih theih dan tur pawh an sawi dun a. Hei bakah sorkar hmasa hun laia Mizoram Legislative Assembly-in a lo pass tawh, The Mizoram Maintenance of Household Registers Bill, 2019 tun thlenga India President kuta la tang pawh sawi dunin, home minister hian chinfelsak thuai a lo tiam a. Myanmar atanga raltlante chhinchhiahna tur Mizoram puala portal an siam chu peihfel a nih tawh thu a lo hrilh.
Chief Minister Lalduhoma pawhin Mizo Territorial Army Battalion din a nih theihna tura union home minister hmalaknaah lawmthu a sawi a. Ram venhimna mai piah lamah Mizo thalaite tana hna siamtu pawimawh tak a nih thu sawiin, a taka kalpui a nih thuai nan Director, Intelligence Bureau nena bawhzui ngai la awm te an sawidun bawk.
Zirtawpni vek khan chief minister chuan Union Finance Minister Nirmala Sitharaman pawh a pisa-ah kawmin Mizoram hmasawnna tur thil pawimawh a sawipui a. Mizoram Rural Bank-a Mizote a tam thei ber an luh theihna turin recruitment rules pawt fan turin union finance minister a ngenna chu a rang lama lo ngaihtuah a intiam a. Mizoramin CSR Fund a tam thei ang ber a dawn theihna tura theihtawp a chhuahpui tur thu leh Mizoram sorkar flagship programme Bana Kaih Scheme atana sum mamawh dante an sawi dun bawk.