Aizawl: Social Welfare Minister Lalrinpuii chuan ruihhlo ti mek an buaipui lai hian, ruihhlo la ti ve lote venhimna kawngah pawh zirtirna an pek nasat a tul thu a sawi.
Thawhlehnia MHIP General Headquarters leh Aizawl District Nasha Mukt Bharat Abhiyaan (Drug Free India Campaign) tangkawpin MHIP |huampui Branch member te tana ruihhlo chungchang inzirtirna leh a thlawnna inentirna, Thuampui YMA Hall-a buatsaih a hmanpuinaah Minister Lalrinpuii chuan, Aizawl DC kaihhruaina hnuaiah Nasha Mukt Bharat Abhiyaan, Aizawl District in kawng hrang hranga ruihhlo dona atan hma an la mek zelna leh MHIP hruaitute pawh ruihhlo do leh a that lohzia inzirtirna kawnga theihtawp an chhuahnate chu lawmawm a tih thu sawiin, “Ruihhlo dona atan keini nuho leh hmeichhiate hian mawhphurhna sang tak mai kan nei a ni,” a ti.
Lalrinpuii chuan chhungkuaa ruihhlo ti an awm hian a tuar nasa ber chu nute hi an nih tlangpui avangin, hma an lakna kawngah pawh nute hnena zirtirna pek hi an thlahthlam theih loh thu a sawi a. “Ruihhlo ti mek kan buaipui lai hian ruihhlo la ti ve lote venhimna kawngah pawh zirtirna kan pek nasat a ngai hle a ni,” a ti.
“Khawtlang leh kohhranah theihtawpin kan inhmang anih pawhin mahni chhungkua hlamchhiah lo ila, engkim bul intanna chu chhungkua anih tlat avangin, nute hian chhungkuaa mahni tihtur leh mawhphurhna te theihtawpa hlen chhuah tum theuh turin ka sawm duh che u,” tiin nuho kalkhawmte a chah bawk.
He hun hi MHIP Vice President Ngurmawii’n kaihruaiin, Aizawl Bawrhsap Er. Lalhriatpuia pawhin thu a sawi bakah, Mizoram Social Defence & Rehabilitation Board atangin mithiamten ruihhlo chungchang inzirtirna an pe a ni.