Prime Minister Narendra Modi kaihhruai BJP sorkarin kum 11 chhunga ram a kaihruainaa hmasawnna hrang hrang a neih chungchangah BJP National Secretary, Anil Antony chuan Aizawl Press Club-ah thu thar thehdartute a kawm.
Nimina thu thar thehdarhtute a kawmnaah BJP National Secretary chuan, Indiain sum leh pai dinhmuna khawvel huapa palina a luah theih dante, ram chhunga highway km 60,000 chuang kum 11 chhunga siam a nih thu te bakah, ram chhung hmun hrang hrangah metro, airport, kawngpui tha leh zau, in tinah electric awm theihna turte, in chhunga tui thianghlim herh hawna tur pek te, digital India hmanga thalaite tihhmasawnna te chu Modi sorkar ngaih pawimawh ber zinga mi a ni reng tih a sawi.
Anil Antony chuan Prime Minister hmalaknaa scheme hrang hrang, he’ng PM Awas Yojana, Ujjwala Yojana, Ayushman Bharat leh Jal Jeevan te chu mi tin tan an mamawh ang hmasawnna thlen tih thupuia innghat vek niin, mipui tana hamthatna tam tak awmte chu mipuiin an hlawkpuizia thute a sawiin,
Mizoram chungchang sawi langin Antony chuan, Bairabi- Sairang Railway Project leh Kaladan Multimodal Transit Transport Project (KMTTP)-te chu PM Modi kaihhruai sorkar hnuaia siam a nih thu sawiin, “Mizoram mai bakah a bul hnai state ten kawng tin rengah an hlawk pui dawn,” a ti.
BJP national Secretary chuan kum 11 chhunga hmasawnna hrang hrang awm chuan kum 2047-a India-in hmasawnna tluantling a neih theihna tura hmalaknate a nih thu a sawi a. Ramchhunga state hrang hrangte an hmasawn zel nan leh khawvel huapa hmasawnna India an hmuh zel theih nan theihtawp an chuah zawl tih a sawi bawk.