Fapa pahnih Isaiah (10) leh Jacob (6) mi leh a pasal Mike Fisher te nena chhungkaw duhawm tak an din laiin, a hun hmasa lamah chuan rilru hahna leh thawpikna a insiam nasa thin a, chuta zirlai a zirchhuah chu mahni tal tala tal mai lovin, Pathian laka rinnna nghah ngam a pawimawh, tih a ni.
Carrie Underwood chuan, “Fa nei tawh Nu leh hmeichhe dang ang bawkin ‘stress’ ka insiam nasa thin. Hringnuna ka hun tawn duhawm leh lawmawm ber thin chu, ‘Engkim mai hi ka thunun thei bik lo. Mahse, a pawi lo. Pathian thununna hnuaiah an awm vek tho a lawm,’ ka tih lai hun hi a ni zel,” a ti.
Kum 42-a upa hi 2017 khan a tlak sualna lamah a hmai a sawh na hle a, hmun 50 velah thui niin, a ban rek a titliak bawk. Kum hnih chhung lekin nau vawi thum a chhiat hman bawk. Tunhma lama a chunga thil thleng sawisel ngai lo leh vui hmui pu ngai lo ni mah se, hetiang harsatna a han tawh meuh chuan a vawikhat nan Pathian lakah a vui.
Carrie Underwood chuan, “Ka nu leh pate tan fanu chhuanawm nih reng ka duh a, Pathian lakah pawh a ni tho. Kan phu loh malsawmna kan dawn thin avangin ka vui ngai lo. Ka duhzawng ka ti thei a, chhungkaw duhawm tak pek ka ni a, ka bula mi tha tak tak an awm bawk avangin vuivaina tur ka nei ngai lo.
“Mahse, nauchhiat indawt chho khan Pathian nen a takin min tawn tir niin ka hria, A tha e. Ka beidawng hman hle. Ka chunga thleng tura ruat a nih chuan ka pawm thlap. Engtik ni ah emaw chuan ka la hrethiam ve ngei ang,” a ti.
Harsatna leh buaina neuh neuh an tawh hnu rei vak lo ah, ‘Jesus, Take The Wheel’ sa lartu leh a pasal te chuan chanchin tha leh lawmawm an dawng chho tan ta.
“Engkim mai hi a lo tha vek, ti thei thinlung kan pu thei ta a, Jacob-a ka’n pai nghal mai a, chuti ang zelin fanau malsawmna duhawm tak tak kan nei ta zel a ni,” tih chu tawrhna phena malsawmna a sawi chu a ni.