Aizawl: Chief Minister Lalduhoma chuan sorkarin thlai thar lei a kalpui chu kumin hi a bul tan kum niin, inzir chunga kalin an hlawhtling thawkhat hle niin a sawi.
Thawhtanni khan I&WRD Conference Hall, MINECO-ah kumin chhunga sorkarin thlai thar lei a kalpui kharna inkhawm buatsaihah Chief Minister Lalduhoma chuan “A bul tan kum a ni a, inzir chungin kan kal a, mahse kan hlawhtling thawkhat hle,” tiin loneitute pawh an lawma a hriat thu a sawi.
Lalduhoma chuan thlai pali tinzawn mah se, Mizo buh pawh hi an titel hram a. Thlai panga kan lei ta tih sawiin, “Heng thlai thlan bik panga zingah hian sawhthing leh hmunphiahah tlem han khaih lak zeuh a awm tih loh chu, a dang pathumah hian harsatna kan tawk lo. Hmunphiaha kan buaina bul chu grade-a then tur kan ti kha a ni a. Loneituten chu chu an harsat a, tun hnuah chuan grade a then tawh loh kan ti ta a ni,” a ti.
Chief minister chuan kumin February 20 atanga sawhthing lei kalpui a nih atangin, vawiin (nimin) a thla li leh ni 10-na chiah a ni a. Tunah chuan a mothar a awm tawh si a, khar rih mai hi thaa an hriat thu a sawi.
Sorkar an insengso nasa tih sawiin chief minister chuan, “Cheng vaibelchhe za vel hi kan sen ral ka ring. Kan theih tawka kan hralh ve bakah hian central sorkar market intervention scheme atangin Rs. vbc 9 vel kan hmuh ve kan beisei thung,” tiin, loneitute hi kawng lakah an kalsan dawn lo va, nakkum lamah pawh a market la tha dawn mah se, an kal zel dawn tih a sawi a.
A rate chhiat kuma lo neitute veng tura he policy hi siam an nih thu leh a rate that kumah chuan an inrawlh a ngai lo zawk dawn tih sawiin Lalduhoma chuan, “A rate a lo chhiat khan he policy hian a thil tum a tihlawhtling a, loneituten rilru hah miah lovin cheng 50-in an hralh thei a ni. Kum khat leh a chanve chhunga mipuite hnena pawisa thlen tam ber sorkarin kan niin ka ring,” a ti bawk.
- CM thusawi langsar zual:
- Thil lawmawm tak a ken tel chu mipui moral a siam tha hi a ni. A thlawna dawn tumna a bo va, mi thawkrimte tan erawh chuan bituk awm miah lo va sum lakluh theihna a ni.
- Environment tichhe lo zawnga lo neih kan kalpui thiam deuh deuh a ngai. Kan ram hi kan dimin kan duat tur a ni. Permanent farming kan ngaihtuah ran a ngai.
- Crop Insurance lamah tan kan la chho leh mek a, a bul tan nan thlai thlan bikah, a chin tamna bialah kalpui kan tum. Loneituten man tlawm taka an thlai an insure theih nan sawrkarin subsidy kan siamsak bawk ang.
- Organic lam kan uar zel a ngai tih kan hria a. Food Testing Laboratory changtlung tak neih a, Organic Certificate te pawh pek theih a, hlawk leh zual kan thlaite hralh kan tum zel dawn.
- State dang chuan kawng hrang hrangin an hming an chher tawh. Meghalaya chuan Lakadong Aieng an larpui mek a, Himachal Pradesh state chuan Apple an larpui. Keini hian Sawhthing hian hming chher ve kan tum ang.