- K. Laltanpuia, Tuidam
Ram leh Hnam humhalh kumpuan chungchangah hian, ngaih dan leh pawm dan a in ang lo fur mai thei.
YMA Kumpuanah hian Ram leh Hnam kumpuan hi a tha a ni ang e, YMA hian kumpuan a kan neih ngun berte zing a mi a ni hial awm e.
Ram leh Hnam kumpuan hian a huap a zau khawp mai a, Mizo Hnam himna leh Kristiante Zalenna tur chenin a huamin ka hria.
Heti hian bul i’n tan dawn teh ang –
Ram leh Hnam humhalhah hian inzirtirna a lo pawimawh khawp mai a, tunlaiah changkanna in min um nasa hle a, hei hian Hnam ralna a keng tel tlat a ni. Eng vang maw, kan tu leh fate chu, A,AW B aiah A,B,C zir thiam tir kan tum hmasa a, pakhat, pahnih aiah, One Two Three thiam tir kan tum alawm mawle, hei hian Hnam boralna a keng phawt.
Hnampui ho chuan an tia lawm, anmahni Hnam tawng an ngaisang a, an Hnam tawng ni lo chu, no.3. ah an dah an ti.
Chutiang khawp chuan, mahni Hnam tawng an ngaisangin an dah lian zawk.
Keini Mizo Hnam tlemte in tuipui ral tawng kan uar ta lutuk hi chu kan inenfiah a ngai khawp mai. Kan Aizawl khawpui Dawr hmingah pawh Mizo tawng inziak aiin Sap tawng an tih ang a tam zawk ta lek lek mai. Chu mai a ni lo, kan tu leh fate naupiang hmingah pawh, A B C hming kai zel kan phuah ta si a, hetiang a nih chuan Hnam anga boralna a thleng mek tih a chiang reng.
Hming bula sap hming kan uar viau lai hian, Almas Uddina te lah chuan sumdawnna hmangin Mizoram an rawn lut chur chur a, an pathian biak hunah lah sang tel teh meuh kan Aizawl khawpuiah an bu var suau suau tawh.
Mizoramah hian Mizo mipa aiin, Mizo hmeichhia lah chu sing tel an tam zawk tawh bawk si, Rel a service tak tak hunah chuan Vai an rawn lut hum hum ang a, manganna hlirin min bawm dawn. Chung hunah chuan indan sen loh chin, chi inthlah kawngah buaina nasa tak kan la tawng ngei ang. Mizoram a, Mizo mipa ten taimak chhuaha tan lak a hun tak zet zet a ni.
Tun atanga Hnam anga tan kan lak a tul khawp mai, chi inthlah punna kawngah tan ila, kan Mizo nula ngei lo chu tih leh kan Mizo mipa ngei lo chu tiin, inthlah punna hre chungin nupui pasal in neih uar pawh a pawi lo mai thei.
Thalaite u, Hnam hmangaihna avang hian tan ila ang u.
Thing leh Mau humhalh chu sawi ngai lo in kan hre thum awm e. Thing leh Mau ramngawte hi nasa tak a kan humhalh a ngai a, a chhan chu tui hna siamtu an ni tih hi hriat reng a tha, thing kung khat kan phun nun hian, mihring nunna sawmhnih chuang kan chhanhim a ni tih kan hriat fo a tha.
Nungcha humhalh kawngah, kan ramah hian nungcha kan hmuh phak loh leh an hming kan hriat phak loh, kan ram a lo cheng tawh si tam tak an awm a chungte kokir tur chuan ramngaw leh an ei tur thing rah an duh zawng phun nun a, humhalh chungin tan ila ang u.
A tawp berah chuan, kan ram zimte hi engti ang in nge hmangaihna ka lantir ang ti chungin, vawiin a Zoram mai ni lo, hmun hrang hranga ka Mizo pui zawng zawngte ka sawm duh tak meuh meuh che u a ni e.