Aizawl: Mizo Students’ Union (MSU) chuan vawiin hian Unqualified Part Time Assistant Professors te sorkarin hun a pek belh leh duh lohna kawngzawh neih an tum.
Inrinni khan MSU chuan Emergency Executive Committee Meeting neiin, sorkar hnena Unqualified Part Time Assistant Professors 29-te ban tura an ngenna chuan awmzia a neih tak loh avangin, vawiin hian Aizawl khawpui – Vanapa Hall atanga Higher & Technical Education Directorate Pisa thleng ‘Quality Education Humhalhna Kawngzawh’ neih an rel a ni.
MSU chuan kawngzawh an huaihawt turah hian Aizawl-a awm College zirlai zawng zawngte kawngzawh turin a sawm a. Tumah zirna ina class la tura kal lo turin a ngen.
MSU chuan Mizoram sorkar chu unqualified ziritirtute bâna an aiawh tur zirtirtu pawh zirna tibuai lova la nghal turin an ngen nawn a. Kawng zawh a thil phutte hi tihhlawhtlin a nih loh chuan a tawp thlengin hma an lak zui zel tur thu an sawi bawk.
Hetih lai hian, kawngzawh huaihawt tur hi Aizawl City College Joint Students’ Union chuan an thlawp thu leh Student’s Union hruaitupui leh college zirlaipui zawng zawng te kawng zawh turin an sawm tih thuchhuah an siam.