Russia-in Ukraine a rûn mekah India chuan he rama a mi awmte chu thiar chhuah tumin hma a la mek zel a. Hemi atan hian Air India chuan Romanian khawpui, Bucharest-ah thlawhna pahnih a tir.
Lirthei hmanga Ukraine-Romania ramri thleng Indian-te hi India sorkara thuneituten Bucharest-ah an hruai leh ang a, Air India thlawhna hmang hian India-ah rawn luhpui tum an ni tih news agency Press Trust of India chuan a tar lang.
Ukraine chung zawn boruak hi indona thleng mekah mipui an him zawk nan mihring phur thlawhnate thlawh phal loh turin Ningani zing khan an ram thuneituten an ti a, hei vang hian India-in a mite a hruai haw hna pawh an thenawm ram khawpui atang hian tih a ngai ta a ni.
Air India thlawhna pahnihte hian Inrinni hian Bucharest an pan dawn niin thuneituten an sawi a. Air India lam erawh chuan an thlawhna an tirh dawn leh dawn loh chungchanga PTI-in biakpawh a tumna an chhang lo.
Ukraine-a Indian embassy pawhin Indian-te hruai haw tumna kawng hi a buaipui zel a. Romania bakah Hungary ram atang pawhin hruai haw tum an ni.
“Tunah hian check point pahnih – Uzhhorod bula Chop-Zahony Hungarian ramri leh Chernivtsi bula Porubne-Siret Romanian border bulah team an inring tawh a ni,” a ti.
Indian, a bikin zirlai, border checkpoint hnaiha khawsate chu Ministry of External Affairs-in ruahmanna a siamte zawma a huhova che chhuak turin embassy hian a ti.
Checkpoint pahnih paltlang ngaite hi tunah hman theih reng a ni a, sorkarin a ruahman anga kal lova mahnia ramri pante pawhin check point patlang vek turin an ti bawk.
Embassy hian Indian chhuak turte chu an passport, pawisa (US dollar-in), ni tin mamawh leh check point-a hmuh tur COVID-19 laka invenna an la tih tihchianna keng theuh turin an ti.
“India Hnam Puanzar kengin emaw, lirthei leh bus-ah emaw tar/bel vek tur a ni,” a ti bawk.
Ukraine-ah hian Indian 20,000 vel an la awm a, a tam ber hi zirlai an ni tih thuneitute chuan an sawi.
Ukrainian khawpui leh Romanian border check point hi km 600 vela hla a ni a, lirthei chuan darkar riat leh a chanve leh darkar 11 inkar vel kal a ni.
Ramri atang hian Bucharest hi km 500 vel a la ni bawk a, lirthei chuan darkar sarih atanga kua vel kal leh a la ngai bawk.
Kyiv leh Hungarian border check point hinkar hi km 820 vel niin darkar 12-13 vel kal a ni.