Assam sorkar chuan Thawhlehni tuk atang khan Golaghat district-a Rengma ramngaw huam chhunga dan lova khawsate um chhuah hna a thawk tan a. He beihpui thlaknaah hian ramngaw hectare 1,500 chuanga zauva dan lova thil sak 2,600 chuang tihchhiat tum a ni.
Forest thuneitute chuan a ni khatnaah hian hectare 4.2 chuanga zau tihfel hman a nih thu leh concrete-a sak in 50 vel leh sumdawnna atana hman in tenau deuh 200 dawn an tichhe hman tih an sawi.
Thuneitute hian ramngaw humhalh chhungah hian khaw 12-ah dan lova in ding 2,648 a awm a, chungte chu um chhuah vek tura tih an ni tih an sawi a. Beihpui hi Sonaribil, Pithaghat, Dayalpur, Dalanpathar, Kherbari, Vidyapur, Vidyapur Bazaar, Madhupur, Anandpur, Rajapukhuri leh Gelajan-ah thlak a ni dawn tih an sawi.
Mi hnawh chhuah hna hi Thawhlehni tuk khan Vidyapur atanga tanin police, paramilitary unit leh forest mi tam takin an enpui a. Excavator leh Pokland machine 100 chuang thawh chhuahpui niin tun hi Assam-a phal lohna hmuna chengte hnawh chhuah hna thawhnaa thawh rip ber tum a ni.
Assam-Nagaland ramri hrul, Uriamghat-a ramngawa dan lova awmte um chhuah tum ber a ni a. Hmalakna pawh venhimna khauh tak hnuaia kalpui a ni.
Golaghat district thuneitute chuan district hrang hrang atangin Assam Police 2,000 chuang bakah forest guard 500 rual dah an ni tih an sawi a. Chief Forest Conservator M.K. Yadava, Inspector General of Police (IGP) Akhilesh Kumar Singh leh sorkar hotu lian dangte pawhin a hmunah an awm chilh.
Yadava chuan hna an thawh hi mumal takin, mi tibuai tlem thei ang berin an ti dawn tih a sawi a. “Tun hi phal lohna hmuna awmte um chhuahna pakhat a ni a. Tun hma lamin chona kan hmachhawn thin a, sorkar hnathawkte beihna thlengin a lo awm tawh,” a ti.
Forest department-in um chhuah tur chin an chhinchhiah hmasa a, a chengte hnenah hriattirna leh inthiar chhuahna hun an pe a. “He hna hi uluk taka duangin, kal dan tur mumal tak siam vek a ni,” tiin Yadava chuan a sawi.
Rengma forest hi Uriamghat revenue circle huam chhunga awm niin boruak tha lo pawh a thleng fo thin a, ramri hrula dan lova chengte hian buaina pawh an siam zauh zauh thin.
Tun hnaia Chief Minister Himanta Biswa Sarma-a’n a tlawh naah dan lova khawsate chuan ramgaw an tichhia a, mi mal hamthat nan kuhva chin nan an hmang nasa tih a sawi a. Kar hmasa khan drone survey hmangin dan lova awmna hmunte hi a thlir leh bawk.
Chief minister hian Uriamghat-a chengte hi Assam-a district hrang hrang — Cachar, Sribhumi, Dhubri, Barpeta, Nagaon, Hojai leh Morigaon atanga kal khawm an ni tih a sawi a. Bihar atanga pemte an awm bawk tih a sawi.
Tun hi July 8 hnua lian taka Assam-a phal lohna hmuna dan lova awmte hnawh chhuah an nih vawi thumna a ni a. A hma pahnih kha Dhubri leh Goalpara-ah neih niin dan lova in sakna hmuna sak 2,000 chuang tihchhiat a ni.
A hmasa pahnihah hian mi chengten duh lohna an lantir nual a, Thawhlehnia Uriamghat-a hmalaknaah erawh hetiang hi lian tham a thleng lo va. Mi thenkhat erawh chuan sorkar hian ramngaw then tuma insawiin mi chengte a tiduhdah niin an sawi ve bawk.