National Investigation Agency (NIA) chuan Haryana-ah Naxal tana thawktu pawimawh tak, ‘ram dona zawnga chetna tura thawk nasa tak’ nia an sawi chu an man tih Nilaini khan thuchhuah an siamah an tar lang.
Naxal tamna, Bastar district, Chhattisgarh atanga chawr chhuak, Rohtak district, Haryana-a cheng mek, Priyanshu Kashyap-a hi Thawhlehni khan Haryana Police-in thu an rawlruk angin an man tih agency chuan a sawi.
NIA team hian a kut atang hian mobile phone leh SIM card pakhat, Tablet, memory card pahnih leh CPI kaihhnawih lehkha pawimawh, ‘rinhlelhawm tak tak’ an man tel tih an sawi.
Kashyap-a hi India-in firfiak pawla a chhal, CPI-a member niin rim takin ram dona zawnga chetna tura a thawk a, Rohtak-ah hian area committee in-charge a ni bawk tih NIA chuan a sawi.
CPI hruaitute hian tun hnaiah an pawla Northern Regional Bureau an tih, Uttar Pradesh, Uttarakhand, Delhi, Punjab, Haryana leh Himachal Pradesh huam chhunga intuai thar leh tumin hma an la nasa hle niin an tar lang bawk.
Intuai thar leh tuma an beihnaah hian ramhnuaia awm kher lova hna thawk leh ramhnuai atanga bei pawh an awm a, an mi leh sa tur dapin hmar lam state-ah an intichak thar leh mek niin NIA chuan a sawi.
An hnuaia pawl leh zirlai pawl awmte chuan India sorkar laka indo an kalpuite pawh an thlawp thin niin an sawi bawk.
NIA hian ramhnuaia che chi bikte hi chu CPI hruaitu lawkte nen pawh hmaichhanah an inkawm fo thin a, pawn lama thawkte erawh an pawl indin thara an chak leh theihna tura hma lak theihna hrang hrangah hma an la niin an sawi.
Pawn lama thawktute hi chu CPI Eastern Regional Bureau-in sumin a pui a, Jharkhand-a mite hetiang hian an thawk deuh ber niin NIA-in a chhuinaah chuan hmuh chhuah a ni.
Anti-terror agency hian a hmain Haryana leh Punjab State Organising Committee incharge, Aman tia an koh, Ajay Singhal leh CPI member Vishal Singh an lo man tawh bawk.