All India Football Federation (AIFF) chuan an league sang ber khelh theih a ni dawn em tih sawi awm mek karah khelh ngei a nih tur thu a sawi a, season thar tan hmain Super Cup khelh a ni dawn tih a puang bawk.
India rama football buaina awm mek chungchang sawi hian Ningani khan New Delhi-ah AIFF hotute leh Indian Super League (ISL) club aiawhte leh league buatsaihtu, Football Sports Development Limited (FSDL) aiawhte an thutkhawm.
AIFF chuan season danga a khar nana hman thin, Super Cup chu ISL khelh hmaa khelh turin a ruahman chhin phawt a, September chawlhkar hnihna leh thumna vel tinzawn phawt niin a hun tur tak erawh la sawiho leh tur a ni.
ISL hi a huaihawttu ber, FSDL leh AIFF chuan inremna, Master Rights Agreement (MRA) an neih mek tawp hnai chu an la ziah chhunzawm rih lo zel a, hei hi league season kalpui theih a nih loh chhan ber a ni mek.
ISL season khelh a nih dawn leh dawn loh a chian rih loh avangin vawi hnih champion tawh, Chennaiyin FC chuan Nilani khan an first-team player leh staff zawng zawng contract chu an titawp lailawk tih an puang tawh a. Anni hma hian Bengaluru FC leh Odisha FC chuan an lo titawp tawh bawk.
MRA kal mek hi December 8-a zo tawh tur a ni a, tun thleng hi chuan a thar ziah emaw, pawh sei tumna emaw a awm rih lo.
“AIFF leh club zawng zawngten thutlukna pakhat siamin a tul a nih chuan khelhna hmun panna a hautak loh zawk nan khelh dan hmang tihdanglamte pawh kan thei vek a ni,” tiin AIFF President Kalyan Choubey-a chuan a sawi .
“Club thenkhatin pre-season an tan tawh a, ni sarih atanga 10 inkar velah kimchang zawkin kan sawiho leh ang a, khelh tan hun tur pawh kan tifel thei ang,” a ti.
Thutkhawmah hian Mohun Bagan Super Giant, East Bengal leh Odisha FC chuan ral atangin an chhim a, ISL club dang 10 chu a hmunah an tel.
Super Cup hi season tawp khar nan khelh thin a ni a, kuminah chuan a tan nan hman a nih hmel ta a. India chuan Singapore-ah AFC Asian Cup qualification round chu October 9 leh 14-ah a khel dawn a, hemi hnuah hian Super Cup hi khelh zawh a nih rin a ni.
India-a league sang ber hi September atanga April inkara khelh thin a ni a, MRA awm sa ang chuan thla thum an khel chauh tihin inremna hi a tawp awn tihna a ni.