US-in chhiah sang zawk laksak tuma hma a lak mek laiin Indian Prime Minister Narendra Modi-a chuan Japan leh China a tlawh dawn a, Shanghai Cooperation Organisation (SCO) Summit-ah a tel ang.
Modi-a hian August 30-ah Japan tlawhin August 31 leh September 1-ah China-ah hun hmangin SCO Summit-ah hian a tel dawn a ni.
Prime minister-in Japan a tlawh tur hi kum tina ram pahnihte inbiak an neih thina tel tur a ni a. Kuminah hian Mumbai–Ahmedabad Bullet Train project chu an sawi tur lian niin Tokyo hian E-10 Shinkansen train pek a tum a ni.
Mamawh inpek tawn chungchang pawh sawi tur zingah telin electric lirtheia hman chi leilung hausakna thil vâng chi chu heta an sawi tur lian a ni dawn.
Heng bakah hian himna, sumdawnna, technology leh Quad (India, Japan, Australia leh US) thawhhona kaihhnawih thilte pawh an sawi ang.
Modi-a hian August 31-ah China a pan ang a, kum 2020-a Galwan Valley-a ram pahnih sipaite an intihbuai hnua a tlawh hmasak ber tur a ni.
SCO Summit-ah telin hetah hian himna, firfiak beihna leh eibar zawnna kawnga thawhho theihna te chu an sawiho tur langsar a ni.
Chinese President Xi Jinping-a nen an inkawm dawn em tih la chiang lo mah se hun remchang erawh a awm theih beisei a ni a, an inbiak chuan India-China inkungkaihna tihnghehna tur thil an sawi dun ang a. SCO hruaitu dang, Russian President Vladimir Putin-a pawh a kawm ang.
Tun tuma prime minister zin tur hi hun rei tak China nena inkar khi awm tawh tihthat leh theihna remchang a ni dawn a, Japan nena inkungkaihna nghet an neih sa tihngheh lehzualna remchang a ni thei dawn bawk.
Modi-a SCO Summit-a a tel tur hian India chu Eurasia ram eng emaw zat thawhhonaah a rilru a la pekzia tihlanna niin mi thiamte chuan an ngai.
Modi-a’n Beijing a tlawh tur hi US President Donald Trump-a’n Indian bungrua an lak luha chhiah sang tak lak a tan lai vel a ni dawn a. Washington hian India laka tariff sang a lak hi Russian tuialhtheiu a leisak vang niin a sawi.
New Delhi chuan America-in tariff sang a lak tur hi sawiselin ‘dik lo leh chhan awm lo’ a ti a, a ram thatna turin hma a la ve dawn tih a sawi a. Modi-a’n Tokyo leh Beijing a tlawh tur hi US kalsana khawchhak ram lian lam a hawina a ni thei dawn em tih chu mi thiamte zawhna a ni mek.
China-a a telna tur, SCO Summit hi August 31 atanga September 1 thleng Tianjin khawpuiah neih a ni dawn a. A member ramte bakah observer ram – China, Kazakhstan, Russia, India, Pakistan, Uzbekistan, Kyrgyzstan, Tajikistan, Belarus, Iran, Turkey, Azerbaijan, Turkmenistan, Mongolia, Qatar leh United Arab Emirates aiawhte an tel dawn a ni.