US President Donald Trump-a’n India atanga an rama bungrua an lak luhah chhiah (tariff) 50%-a sang a lak chu Nilaini atang khan kalpui tan a ni a, hei hian ram pahnih inkawmngeih tak thin inkar pawh a nghawng deuh.
Tariff 25%-a laksak mek thin chu India hian Russian tuialhthei a leisak hrem nan Trump-a chuan 25% dangin a tihpun sak a, khawvela eocnomy lian zinga thang chak ber Asian chhim ram than a tithu pha ngei tura ngaih a ni.
India-a trade ministry chuan engmah sawi a la nei lo va; mahse, Indian sorkar chuan New Delhi hian hremna atana 25% lak belhsak an ni chu US hian a ennawn ngei an beisei nia sawi a ni a, sorkarin nghawng na tak a neih lohna turin ruahmanna a siam bawk nia sawi a ni.
US-in 50%-a sanga chhiah a lak tur zingah hian thawmhnaw, tlereuh, pheikhawk, infiamna bungrua, inchhung bungrua leh bawlhlo pawh a tel.
Tariff lak zat thar hian sumdawng tenau leh hna tam tak a nghawng rin a ni a, heng zingah hian Prime Minister Narendra Modi-a sei lenna, Gujarat pawh tuar na tur zingah tela ngaih a ni.
Indian sorkar chuan thil thawn chhuaktute chu ram dangah la, savun, tlereuh thawm tam turin a dawr a, an sumdawnnaah suma puihna pawh a pe mai thei nia sawi a ni.
India hian sumdawnnaah UK, Australia leh United Arab Emirates leh European ram tam tak inremna siampui tawh a nei a, heng ramah hian tam zawk a bungrua, a bikin la a thawn tam lehzual dawn nia sawi a ni.
Washington chuan India-in Russian tuialhthei a lei hian Moscow-in Ukraine a rûn mekah puiin New Delhi-in hlep a neih phah bawk niin a sawi a. India erawh chuan hei hi a dik lo tih sawiin US leh European-te chu Russia nen sumdawnnaah an la inzawm ve reng tho tih a sawi.
Chhiah laksak tihsan chungchangah India-a Foreign Minister of State Kirti Vardhan Singh-a chuan thuthar lakhawmtute hnenah, “Kan economy a nghawng lohna turin hma kan la a, kan economy chak tak hian he hun hi min paltlangpui ngei ang,” a ti.
“Kan ngaih pawimawh chu energy kan neih theihna tur a ni a, khawi atang pawhin kan hlawkna tur a nih chuan kan lei zel ang,” a ti bawk.
Tual chhungah chuan Hindu kût lai a nih avangin sum a che tlem a, sumdawnnaah nghawng a nei nghal rih lo niin a lang a. Hetih lai hian thil dahkhamna keh share leinaah erawh thla thum chhunga a hniam lai ber a ni thung.
Indian rupee pawh a hlutna hniam belh lehin chawlhkar thum chhunga a hniam lai ber a thleng.
Indian thuneitute chuan US-in ram danga bungrua a lak luha chhiah a lak chawhrual hi 7.5% niin an sawi a, US Trade Representative pisa erawh chuan lirtheiah 100% a nih thu leh lo neihna kaihhnawiahh 39% a ni bawk tih an sawi.
Nilainia tariff tihsan a nih hma lawk thleng khan US leh India thuneitute hi an la indawr a. A hmain vawi nga indawr tawhin an hlawhchham zel bawk.
Ram pahniha thuneitute chuan politics-a inhmuh fuh loh leh indawr fuh loh laklawh vangah an puh a. Ram pahnih insumdawn tawnna hi kum 2024 khan $ tluklehdingawn 129 niin US Census Bureau chuan US hian $ tluklehdingawn 45.8-in sum a tiche tlem zawk niin a sawi.
India hian ram danga thil a thawn chhuah $ tluklehdingawn 87 man zinga 55% dawn hi US-a a thawn a ni a, tariff sang avanga a thawn tlem chuan ram dang, a bikin Vietnam, Bangladesh leh China-in thawn tam sawtin an hlawkpui tura ngaih a ni.