Donald Trump-a’n tariff sang tak laksaka a hrem mek laiin Indian Prime Minister Narendra Modi-a chuan Pathianni khan China a thleng ta.
Nilaini khan US-in Indian bungrua a lakluhte chu chhiah 50% a laksak tan a, hei hi Delhi-in Russian tuialhthei a lei chhunzawm zel avanga US president-in a hremna a ni.
Mi thiamte chuan chhiah sang taka lak hian India atanga thil thawn chhuah na taka a nghawng an ring a, thah a tumna bi pawh a khawih buai phak an ring.
China hruaitu, Xi Jinping-a pawh US-in tariff sang tak a laksak ve bawk avanga Chinese economy hniam thei dan tuma hma la ve mek a ni bawk.
Hetiang karah hian khawvela mihring cheng tam berna ram pahni hruaitute hian tun hma lama an inrintawn lohna leh ramria an buaina thinte dah thaa inkawmngeih an tum mek.
“Mawmmang taka sawi chuan he inkungkaihna hi khawvel pum nghawng thei tur a ni,” tiin Chatham House-a Chietigj Bajpaee leh Yu Jie te chuan an editorial-ah an lo ziak tawh nghe nghe.
India leh China hi khawvela economy lian ber pangana leh pahnihna an ni mek.
India thanna hi 6% chung lam, economy $ vaibelchhe nuai li leh stock market-ah $ vaibelchhe nuai nga tling hnai niin International Monetary Fund (IMF) chuan kum 2028-ah chuan khawvel economy lian pathumna a ni phak dawn niin a sawi.
Beijing-a Wusawa Advisory dintu leh chief executive Qian Liu chuan ram lian pahnihte inkungkaihna hian ngaihven a hlawh lo thei lo tih a sawi.
Hetih lai hian inkungkaihna hi an siam mai thei dawn em a hriat loh.
Ram pahnihte hian ramriah inmil lohna lian tak an nei a. June, 2020-a Ladakh-a Galwan Valley-a an intihbuaina phei chu kum 40 chuang chhunga an intihbuai nasat ber tum a ni.
Hemi hnuah hian inthlawhpawh khar niin leh tan tuma inremin visa leh Chinese investment-te tihtawp a ni a, India hian TikTok telin Chinese app 200 chuang an rama hman a khap.
India hian Asia chhim lama a mil loh tak, Pakistan chu China hian a kawmngeih tlat bawk a, hei hi mutan a ni thei bawk.
Tun hnaiah Delhi leh Beijing inkar hi a tha hret hret a. Thlawhna inthlawhtir lehna tur ruahmanna tifel tawhin India hian Chinese visa pawh pek chhuah leh a tum.
Modi-a hi Shanghai Cooperation Organisation (SCO)-a tel tura kal niin khawthlang ramte tanhona karah khawchhak ramte tanhona a ni a. China leh India bakah Iran, Pakistan leh Russia an tel.
India hi a hma lam chuan he pawlah hian tel mah se thawm a nei vak ngai lo. June thlaa SCO defence ministers’ meeting-ah pawh khan April 22-a a awp chin Kashmir-a mi firfiakte beihna chungchang telh loh a nih avangin thuchhuah siam turah pawh a hming a dah lang ve duh lo.
China-ah hian Modi-a hian Xi-a leh Russian President Vladimir Putin-a a kawm dawn a. An pahniha a hmuh hnuhnung ber chu Brics summit-a nikum October, 2024-a Russia-a an inkawm kha a ni.
China a pan hma hian Modi-a hian Japan a tlawh tawh bawk.