Lirnghing na tak an tawrh avanga mi 800 chuang thi an awm hnuah India chuan Thawhtanni khan Afghanistan-ah chhawmdawlna thil hrang hrang a thawn.
External Affairs Minister S Jaishankar-a chuan Taliban Foreign Minister Amir Khan Muttaqi biain an dinhmunte a zawt a, a tul a nih chuan puihna dang pawh pek a inhuam thu a hrilh.
Magnitude 6.0-a nain Pathianni zan zanlai thlen hma hreta Afghanistan khawchhak a sawiah hian mi 800 chuang thi awm tawhin mi 3,000 dawnin hliam an tuar bawk a. Kunar province-ah phei chuan khaw tam takah in dingte a tlu chhe vek.
“Afghan Foreign Minister Mawlawi Amir Khan Muttaqi-a nen vawiin khan kan inbia a, lirnghing avanga an inhlohte ka tawrhpui thu ka hrilh,” tiin Jaishankar-a chuan Thawhtanni tlai khan social media-ah a tar lang.
Jaishankar-a hian India-in Kabul-ah chhungkuaa mut theihna puanin 1,000 thawnin Indian mission pawhin Kunar-ah ei tur tonne 15 a thawn thu a sawi a. “Chhawmdawlna dangte pawh India hian naktuk (Thawhlehni)-ah a thawn leh ang a. Hliam tuarte pawh lo dam thuai sela tiin ka duhsak a. An hun khirh tak tawh mekah hian India chu Afghanistan kiangah a awm reng a ni,” a ti.
Prime Minister Narendra Modi-a pawhin lirnghing avanga nunna tam tak hloh a ni chu pawi a tih thu social media-ah a tar lang a. “He an hun khirh takah hian a tuartute kan hre reng a, kan tawngtaipui a; hliam tuarte lo dam thuai se kan ti. India chuan a tul angin puih leh chhawmdawl a inhuam reng a ni,” a ti bawk.
India hi Afghanistan-in chhiatna a tawh mekah hian puihna thawn hmasa ber ram zingah a tel a ni.