Thawhtanni khan chief minister hoin Thenzawl peace city lawmna hun hman a ni a, heta a thusawinaah hian CM chuan Mizoramin khawpui mawi leh changkang tak a neih ve theih nana khawpui thar din chu an tum a nih thu a sawi.
Peace City hian eng chen nge min thlenpui zel dawn tih chu hunin a la hril chho turah ngai ila, thil dang ang bawka sum siamna mai mai leh zuzi leh tur a ni ang tihte pawh a hlauhawm letling ta zawk e.
Sorkar hian eng ngaihtuahna hmanga he thil hi ruahman nge an ni tih a hriat rih mai loh a, engtinnge hma a lak chhoh zel dawn tih pawh a hriat hek loh. Mahse, ngaihchan loh theih loh erawh chu a ni si a ni.
Sorkar term liamta MNF sorkar-ah khan, khatih hunlaia Dy. CM Tawnluia khan Aizawl a pelican crossing a hawn tumin Aizawl chu Music city a siam tum a nih thu a sawi bawk a, mahse eng em a thleng zui leh ta lem hlei lo a. Tuna CM peace city hian eng chen nge a thlen ang tih chu hunin a la hril chho zel ang chu.
Central lam atanga sum um a, kan sum hmuh theihna tur a nih chuan eng eng emaw phuahchawp ringawt maite hi kan la ang tluang zel rihin a lang a, ngaihtuah chian chuan ho tak, mipui min bawl kualna mai mai nite hian a lang thin a, kan hmalam zel thlir chho chungin eng city nge kan siam chhoh leh ang tih i ngaihtuah tlang leh phawt mai teh ang u.