Aizawl: Dampa bial by-election neih turah MNF party-in vawiin hian an party official candidate tur an puang dawn.
MNF party chuan Dampa bial by-election lo awm tura an party official candidate tur an tifel tawh. Vawiin chhun dar 12 hian Mizo Hnam Run-ah an puang dawn a ni.
MNF hian an party President Zoramthanga Chairman-na hnuaiah member secretary bakah member 10 awmna nomination committee dinin, Thawhtanni khan President chamber-ah he inthlan lo awm tura an party official candidate tur ngaihtuahin an thukhawm a ni.
Dampa bial by-election lo awm turah hian rorel lai ZPM party chuan an party official candidate an puang hmasa ber a. He biala MLA inthlanpui hnuhnung bera ZPM candidate lo ni tawh Vanlalsailova a nih thu an lo puang tawh a ni.
Hetih lai hian, INC leh BJP lam thawm a la reh rih a. Anni pawhin an party official tur an puan thuai a rinawm.
July ni 21 khan Dampa bialtu MLA Lalrintluanga a thi a. He thihna avangin Dampa bial-ah by-election neih a ni dawn a. Tunah hian he inthlanna nei turin inbuatsaihna kalpui chhoh mek a ni a. Election Commission of India by-election neih hun tur erawh a la puang lo thung.