Aizawl: Home Minister K Sapdanga leh Excise Minister Lalnghinglova Hmar ten nimin khan Vaivakawn Police Station an tlawh a, police-te fuihtharna leh hmasawnna tura hmachhawp thenkhatte an sawi.
Home Minister K. Sapdanga chuan police station-a tlu lut tawh chin chu tanpui ngai tak tak an ni thin tih sawiin, an mamawhna zawna theihtawp chhuahpui thin turin a chah a. Rangvamual leh Phunchawng te an bial tel avangin thawktute chu an hahzia an hriatpui tih a sawi a. An bial chhunga khawtlang hruaitute leh mipuite thawhpui thiam turin a chah bawk.
Police uniform hian zahawmna a keng tel tih sawiin, “Kan hnathawhnaah he zahawmna hi vawng a, phochhuak thei turin mi mal tinin mawh kan phur a ni,” tiin, UD&PA minister ni bawk, K. Sapdanga chuan Mizoram hmun hrang hranga police infrastructure tlabal chu UD&PA Department atangin thawmtha tura hma lak mek a nih thu a sawi.
Excise Minister Lalnghinglova Hmar, Aizawl West-II bialtu MLA ni bawk chuan Excise department, Vaivakawn Siamtha Pawl (VSP) leh police tangkawpin Vaivakawn-ah zu leh ruihhlo umbo beihpui thlak a ni a, veng chhunga ngawlvei riakkhawm thinte pawh hnawhdarh thin an nih thu a sawi a. Vaivakawn khawtlang thenfai kawnga hmalaknaah police-in theihtawp an chhuahpui thin chu lawmawm a tih thu a sawi.
Minister pahnihte hi Vaivakawn khawtlang hruaituten an tawiawm a ni.