AZL: MNF party chuan tun hnaia Manipur-a pawl indin thar, Mizo National Front – Integration Movement (MNF-IM) nen inzawmna an neih loh thu an puang.
Nilainia an thuchhuahah MNF General Hqrs chuan, Manipur-a Mizo National Front – Integration Movement (MNF-IM) inti ten tun thla ni 15-a pawl din a, Mizoram nen inzawm emaw, Union Territory a awm emaw beiseia an hmalakna thu tun thla ni 16-a an puanzar chungchang chu engmah hriatpui an nei lo va, MNF hming an lo inphuah ve chungchangah pawh inzawmna pakhat mah an nei lo tih an sawi.
MNF chuan, Manipura Zofate inpumkhatna kawnga harsatna an tawh chungchang leh hemi kawnga inpumkhat lehzualna tura hma lak an tumna chungchangah pawh inrawn tawnna leh inbiakpawhna engmah MNF chuan a nei lo va, MNF member zawng zawngte pawhin he pawl, Manipur-a MNF-IM din chungchangah buaina emaw inkungkaihna emaw, engmah an nei lo tih lo hre turin an inhriattir.
Mizo mipui hriat atan Manipur MNF-IM leh Mizo National Front, General Headquarters, Aizawl, Mizoram chu inzawmna engmah a awm lo tih an puang a ni.