Aizawl: Urban Development & Poverty Alleviation Department Minister K. Sapdanga hovin Aizawl khawpui tawt tihziaawmna tur leh khawpui hmasawnna tura hmalaknate an sawi ho.
Vaivakawn Auditorium-ah nimin khan Aizawl Sustainable Urban Transport Project (ASUTP) hnuaia hmalakna leh Temple Square leh Vaivakawn inkar kawng thawm thatna tura ruahmannate sawi hona leh inhrilhhriatna, ‘Sensitization Meeting on Corridor & Junction Improvement Project under ASUTP’ neih a ni.
Thutkhawmah hian UD&PA minister chuan ASUTP-in a tum ber chu Aizawl a lo nawm zawk theih nan leh traffic jam thinte a ziaawm zawk theih nana kawng tihzauh te, mipui him taka an chet vel theih nana kalna nuam, footpath tha leh changkang zawk siam a nih thu a sawi.
K Sapdanga chuan tun dinhmunah ASUTP hnuaiah hian Temple leh Vaivakawn inkar bakah Bawngkawn leh Kulikawn inkarte thawm thatna tura ruahmanna siam mek a nih thu sawiin, ruahmannate a hlawhtlin thuai theih nan khawtlang hruaitute chu theihtawp chhuahpui tur te, kawngpui tihnawk zawnga lirthei dah thinte vil uluk lehzual turtein a ngen.
Aizawl West II bialtu MLA Lalnghinglova Hmar pawhin he project hi mipui ta, mipui that tlanna tur a nih avangin thawh hona tha a pawimawh tih a sawi a. Veng mipuiin theihtawp chhuaha an tawiawm zel a beisei thu a sawi bawk.
Thutkhawmah hian UD&PA leh PWD department hotute bakah Tuikual, Dinthar, Dawrpui Vengthar leh Vaivakawn khawtlang hruaitute an tel a. ASUTP buaipui tura sorkarin a rawih, Mott Macdonald Consultancy atangin Manish Rege, Project Planning, Design & Management Consultant leh HVL Zarzoenga, Programme Coordinator ten Temple Square leh Vaivakawn inkar kawng (1.87km) tihhmasawnna tura ruahmannate an sawi.
Ruahman dan chuan Dinthar peng thuam tihzauh te, Temple leh Vaivkawn inkar kea kalna thawm te, Step 22 awm thawm te, parking zone leh bus dinna changtlung zawka siam leh retaining wall thawm ngaite thawm te thawh tum a ni.
Thutkhawmah hian khawtlang hruaituten an duhdan leh ngaihdante an sawi a, ruahmanna siamnaah an telve theih nan kawng hawnsak an ni.
Sensitization Meeting neih zawhah UD&PA Minister leh SYS Minister-te hian Vaivakawn (chuan hnuai) leh Hunthar veng inkar kawng, Fire & Emergency Services Headquarters bula chhuak chu mipui tam zawkin tangkai zawka an hman theih nan, thawm that theih dan turte an enfiah nghal a ni.