Maharashtra chu India rama sumdawnna atana mihring hman tamna ber niin kum 2023 chhung khan hemi kaihhnawih thubuai hi 388 ziah luh an ni a, mi 955 chhanchhuah an ni bawk tih National Crime Records Bureau (NCRB) chhinchhiahnaah tar lan a ni.
Khawthlang lam state-ah hian tun hnai kum eng emaw ti kal ta atang khan sumdawn nana mihring hralh leh lei hi a pung a ni.
Kum 2022 khan thubuai 295 ziah luh niin 2021-ah 320 ziah luh a ni a. Kum 2023-ah India rama sum dawn nana mihring hman thubuai tamna ber state ni lehin Telangana (thubuai 336) leh Odisha (162)-ten an awt a ni.
Police-in heng thubuai an chhui zuinaah hian a zavai (100%)-ah chargesheet pawh an siam tawh.
Sumdawnna atana hman tuartu zinga mipa 79 leh hmeichhia 60 chu kum 18 hnuai lam an ni a. Heng aia upaah erawh mipa 17 chauh leh hmeichhia 779 an ni thung tih NCRB chhinchhiahnaah tar lan a ni.
Kum 2023 chhung khan police hian kum 18 hnuai lam mipa 76 leh hmeichhia 63 an chhanchhuak bawk.
Thuneituten mi 955 an chhanchhuah zinga 907 chu Indian an ni a, Nepalese pali, Bangladeshi 23 leh ram dang mi 21 an ni.
Sumdawn nana mihring hman thubuai chhuina atanga a lan dan chuan mi pathum chu hna thawka chhawr luih tura tih an ni a. Hmeichhia 852 chu nawhchizuar atana tih niin mi dang 94 erawh chhan hrang hrang vanga hralh an ni.
Maharashtra hi mipat hmeichhiatna kaihhnawiha mihring hmanga sumdawnnaa kalpui tuartu tam berna a ni tel a. Telangana-ah 597 awmin an dawt a, Bihar-ah 155 an awm bawk.
Kum 2023 chhung khan naupang bo 4,619 an awm am heng zinga 2,347 hi hmeichhia niin bo zinga 2,574 chu hemi kum vek hian an chin chhui chhuah lehnghal an ni.
Maharashtra-ah hian kum 2022 thleng khan naupang bo chhui chhuah la ni lo hi 45,696 an la awm a ni.
Kum 2023-ah khan mi bo 1,22,248 awmin 71,079 chu hemi kum vek hian chhui chhuah lehnghal an ni a. Heng zinga 30,332 hi mipa niin hmeichhia 40,743 an awm a. Mi 51,169 erawh an chin la chhui chhuah theih loh an ni tih NCRB chuan a tar lang.