Kar kalta zirtawpni khan Agriculture minister PC Vanlalruata chuan thuthar thehdarhtute hmaah sorkarin sawhthing a lei danah thil fel lo a awm a, cheng vaibelchhe 4-5 vel chu a chingpen nia a hriat thu a sawi a. A thupuan chhuah hi a lungchhiatthlakin leh lamah chuan hetianga minister in a puang mai duh hi a lawmawm letling hle.
Sorkara thil fel lo awm hi sorkar hian mipui hriat loha zep ral a bo hlen tir an tum ngar ngar thin a. Chhuichhuah theih loha mipui pawisa luangral leh bo hlen pawh kan ramah hian a tam tawh hle. A chhuitu tur an han din a, an chhui an chhui a, a tawpah mipuiin kan theihnghilh tawh nia a lan hunah a inquiry an khar fel a. A tisualtu hrem kan hriat loh a, hunin a liam pui tak hi a tam em em a ni. A tuartu erawh mipui kan ni.
Engkim thup anih avang khan hun a lo rei chuan a tisualtu ngei pawh thil tihsual nei lo lenin an leng a. Mipui lam chuan rinhlelhna mitin en mah ila an inthlahrung chuang ngai lo. Hetiang anih avang hian kan society-ah sual pawmzamna a lian tulh tulh a. Kan society kal chho mekah pawh sualna hrim hrim pawisak lohna thui tak a thlen tawh a ni. Eirukna dik lo taka inhnamhnawih ngei nia kan hriat ten biakin lamah pulpit an han chan zui phei chuan kohhranah ngei pawh nghawng tha lo a nei nasa hle. Hetiang tih ching hrem loha chhuakte chu sum leh pai nei hlei hlei an lo ni a. Anmahni avanga ka rinna lam a nghawng nasatzia pawh hi sawi fe tham a awm a ni.
Tuna kan Agriculture minister in a puan hi chu thil hrechiang lova sawi mai mai a ni lo tih a chiang a. Mipui hmaa a puan ngam tawh hi chuan he mipui pawisa chingpen lai hi a rang thei ang berin hremna lekkawh ngei se la, a hrem theitu chu sawrkar a ni a, a hrem duh leh duh lohah engkim a innghat ta. Kan sorkar hi sual hre renga thup tum sorkar nge a nih a, sual hrem ngam sorkar tih pawh a lang fiah thuai turah ngai ila. Dik lo zep ral puitu sorkar a nih ngai chuan rorel tlak lo mai ni lovin, anmahni pawh hrem ngai an ni tihna a ni ang. Mipuiin i lo thlir ang u.