Kerala Blasters FC chuan Spanish centre forward Koldo Obieta Alberdi an la lut a, kum khat chhung atan contract an ziahpui.
ISL club hian kum 31 mi, Obieta hi Spanish second division B club Real Union atangin an la lut.
Guernika, Spain-a piang, Obieta hian an khaw club, Gernika Club atangin bul a tan a, kum 2012 khan senior team-ah a tel tan a. Spanish club hrang hrangah a khel kual a, Zamudio, SD Amorebieta, CD Tudelano leh AD Alcorcon velah te a kual a, goal pawh a thun ve nual thin.
Obieta hi tharum ngah tak, boruakah pawh hlauhawm thawkhat a ni a, awmna lai tur a hriat bakah a finishing a tha nia an sawi a ni a. Penalty box chhungah a hlauhawm a, pawn lam atang pawhin goal a thun fo bawk a. Team-in an mamawh dan azirin position hrang hrangah pawh a khel kual thei niin an sawi.
Sporting Director Karolis Skinkys chuan, “Obieta hi forward tawn hriat nei tha tak mai a ni a, Spanish club eng emaw zatah a lo khel kual tawh a. A thatna hi kan team-in tangkai taka hman theih kan beisei a, tlar hmaah nasa takin hma kan sawn phah ngei ang. Kan team tichaktu a ni dawn a, a zarah lehlam pawl kan nawr na viau dawn a ni,” a ti.
Obieta chuan, “Kerala Blasters atanga sawmna ka dawn khan internet atangin eng ang club nge an nih tih ka en nghal a. Club changtlung tak, tantu nei tha tak an ni tih ka hre thei a, hetiang chhungkuaa ka tel thei hi lawmawm ka ti a. Khelmuala inlan hun ka nghakhlel a, theihtawp chhuah ngei ka tum,” a ti.
Kerala Blasters CEO Abhik Chatterjee chuan, “Season thar atana ram dang mi kan lak luh hmasak ber, Obieta kan nei thei hi kan lawm hle a. A tawnhriat neih that te, a tuihalna te hi kan tlar hma tichaktu a nih ngei kan ring a, kan squad tihlutu a ni dawn chiang a, chona kan hmachhawn chhoh turah a tangkai hle ang,” a ti.