Mizorama ball beng thiam ber zawnna inelnaah Hunthar leh Bungkawn Local Council an ni ta.
October 1 atanga R. Dengthuama Hall, Mualpui, Aizawla Mizoram Volleyball Association (MVA) buatsaih GIG Motors Inter Village Volleyball Tournament-ah mipaah Hunthar chuan ITI Veng chu 3-0-a hnehin ball beng thiam veng an nihna an lantir nawn leh.
Pro Volleyball League club pawh nei leh Mizorama mipa volleyball inpui pakhat, Hunthar hian Zirtawpni zana final-ah harsa lem lo takin an tumpui hi 25-17 , 25-10, 25-19-in an hneh.
Final-ah hian ITI hian an tawnhriat neih tam loh an tuar a tih theih a.A hma zan chiah semifinal-a champion lai, Khawhai an hneh tuma che tha tak, Vanlalduhsaka (Ditea) chuan a hma zan a phak lo va, a vaw sual tam hle a, hei hi an tuar tel bawk.
Lehlamah inelna neih hnuhnung bera finalist, Mizorama volleyball inelna sang ber, Pro Volleyball League leh veng/khua inelna a sang ber thlenga tawnhriat lo nei tawh an kawl nual a, captain Remsangzuala (Lalmama) hovin senior player Lalruatfela Sailo te pawh an kawl a, hun pawimawhah talbuai miah lovin an khel a tih theih.
Mipa final khelh hmaa hmeichhe final-ah YMA volleyball champion lai leh Pro Volleyball League club nei veng, Bungkawn chuan Thenzawl South VC chu 3-0 (25-16, 25-14, 25-16) bawka hnehin an champion a. Veng/khua inelna lian pahnih nomawi an kawl kawp mek tihna a ni.
- Hmeichhe Final Result
Bungkawn LC bt. Thenzawl ‘S’ VC (3-0)
25-16, 25-14, 25-16
Best Setter – Melody Lallawmkimi, Thenzawl South
Best Spiker – Chingnunkimi, Bungkawn
- Mipa Final Result
Hunthar Veng LC bt. I.T.I Veng LC (3-0)
25-17 , 25-10, 25-19
Best Spiker – Laldampuia, Hunthar Veng LC
Best Setter – Francis Lalhmingthanga, Hunthar LC