Aizawl: Mizoram sawrkar department hnuaia direct recruitment hmanga hnalak reng rengah MPSC-in question set vek turin Mizoram sawrkar chuan MPSC limitation of function a siam tha.
Kalphung hmasaah kha chuan Pay level 05 leh a hnuai lam chu department-in question set leh recruitment an khawih thin a. MPSC hian Pay level 06 leh a chung lam a khawih thung a ni.
Sawrkarin ruahmanna thar a siam dan chuan sawrkar department hnuaia direct recruitment-a hnalak tur reng rengah chuan department-in a khawih chinah pawh question set chu MPSC chauhvin an set tur tih a ni.
Department-in mahniin question a set theih tawh lo va, question set tura mi dang rawih a remchang tawh lo va. Question set bakah hian exam kaihhnawih dang answer script endik leh tul dangah MPSC rawn hmasa chungin, department-ten MPSC hi hna lak chungchangah an puihna an dil thei ang tih a ni.