Aizawl: Inrinni khan Dr Vanlalthlana, Education Minister chuan Rawpui khuaa zirna in pathumte tlawhin zirtirtute leh khawtlang hruaitute nen heng school pathum – Govt. Rawpui Primary School, Govt. Rawpui Middle School leh Rawpui High School te hmasawnna tur te a sawipui a. Rawpui HS (GIA) tlawh hmasain, he school enkawlna kawnga khawtlangin theihtawp a lo chhuah tawh thinnaaah lawmthu sawiin, kawng awm anga anga theihtawp chhuahpui zel a duh thu a sawi.
Govt. Rawpui PS-ah hian zirlai naupangte infiamna tualzawl chu PCC flooring an mamawh hle mai a, hmalak dan tur te sawipuiin, VC-in tha thawhin, a siamna tur tumsak an inhuam thu an sawi bawk.
Govt. Rawpui MS-ah hian zirtirtute nen inkawm hona hun neiin, zirtirtuten an harsatna leh mamawhte an lo thlen a, Department official te nen uluk taka an lo ngaihtuah zui tur thu a sawi bawk.
Minister hian Govt. Bungtlang HS pawh tlawhin School mamawh hrang hrangte a hmunah enpuiin a theih anga anga hmalakpui zel a tum thu a sawi bawk.
School education minister hi department official, Dy Director, School Education, Dy State Project Director, Samgra Shiksha Mizoram leh District Education Officer, Hnathial ten an tawiawm a ni.