Bihar assembly inthlan turah rorel lai, NDA tangrual chuan chawlhkar eng emaw zat an inrawn hnuah party hrang hrangten dinna tur bial zat an inchan sem turah inremna an nei ta a. Hetih lai hian eptu tang rual, Mahagathbandhan pawh an inching fel tel bawk.
Union Minister Dharmendra Pradhan-a chuan Pathianni khan NDA tangrualten an dinna tur bial zat an insem fel thu hi X-ah tar langin BJP leh Chief Minister Nitish Kumar-a kaihhruai, Janata Dal United chu bial 243 awmah bial 101 ve veah an ding ang.
Upendra Kushwaha kaihhruai, Rashtriya Lok Morcha leh Jitan Ram Manjhi-a kaihhruai, Hindustan Awam Morcha (HAM) chuan bial ruk ve ve an chang dawn niin BJP atanga inthlan in-charge Pradhan hian a tar lang a ni.
Chirag Paswan-a kaihhruai, Lok Janshakti Party (Ram Vilas) chuan bial 29 an chang dawn bawk.
BJP-in Bihar-a an thawhpui party hian bial 40-45 din ve an phut a, BJP hian bial 25 chauh an lo pe tawh thung a. An hruaitute chuan Prashant Kishor-a kaihhruai, Jan Suraaj Party nen pawha thawhhona siam mai pawh an pawi ti lo nia sawi a ni.
Pradhan-a hian LJP chief hi a rilru thlaksak tumin vawi tam tak a kawm a. BJP chuan bial khat dang an pek belh thei a, chu chu Janata Dal United nena an inpek theihna sang ber a nih thu pawh a hrilh.
JDU hian kum 2020 inthlanah khan bial 115-ah chuhin BJP-in bial 110 an chuh thung.
LJP hian kum 2024-a Lok Sabha inthlanah khan bial ngaa an dinah hnehna an chan vek bakah kum 2020 assembly inthlanah an dinna bial zat atanga chhutin an che tha hle bawk a, hei vang hian tun tum inthlanah hian bial tam zawk chan ve an phut a ni.
Paswan-a hian Lok Sabha bial nga an neih mek chhunga assembly bial hnih dang tak pek belh leh pawh a phut a. LJP hruaitu hlunte tan dinna bial pek a duh bawk a ni.
Dinna tur bial zatah inmil tawk lohna neuh neuh neih ni mah se Pradhan-a’n a tar lan dan chuan an inrem thei ta niin a lang a ni.
Mahagathbandhan hian ni rei lo te hnuah dinna tur bial an insem dan tur an tifel dawn nia sawi a ni a, tun karah hian manifesto intawm pawh puan an tum.
PTI chuan party lian pahnih, RJD leh Congress chu an indawr mek zel a, Thawhtanni pawh khan RJD hruaitu pahnih, Lalu Prasad leh Tejashwi Yadav te chu Delhi-ah kalin inbiak chhunzawm an tum nia sawi a ni a, chanchin hriat hman a ni lo.
Congress General Secretary Jairam Ramesh-a chuan an party president, Mallikarjun Kharge-a chuan Bihar-a an thawhpui party hrang hrang hruaitute a kawm vek tawh tih a sawi.
“Congress president hian ni hnih kal ta chhung khan a be kual vek tawh a, Congress leh party dang thenkhatin chak thei nia inngaihna bial thuhmun tlem azawngah an nei avangin thutlukna tlem siam hmabak a la awm a ni,” a ti.
RJD leh Congress hruaitute chu an inbe zel tih a sawi a, “Mahagathbandhan-ah hian thawhpui leh min zawmtu an awm belh zel a, bial inchan sem pawh a ngai zel a. Ni hnih thum hnuah chuan tihfel vek a ni ang,” a ti.
PTI chuan Congress hian bial 50 aia tam, bial 70 aia tlem an chang dawn niin an tar lang a, hei hi Bihar inthlan hnuhnung bera an dinna zat vel a ni a. Inthlan hnuhnung berah khan bial 19-ah chiah an chakl thung a, RJD hian bial 144 an chuhah bial 75 an la ve thung.
Bihar hi thawh hnihin, November 6 leh 11-ah vote thlak tur a ni a, November 14-ah vote tlate chhiar a ni dawn a ni.