Aizawl: MIMA Gen. Hqrs. office-ah MIMA chuan Emergency Executive Meeting MIMA office-ah ko a. Hetah hian tuna Lammuala 1st International Star Expo neih mek chungchang an sawiho va, expo-ah a buatsaihtute hian dan leh dun an ngai pawimawh lo leh advertisement an tar angin an kalpui lo hle nia hriain heng a hnuaia mi ang hian thu pass a ni.
- Central Consumer Protection Act 2019 Section 89-in a sawi angin he Expo hian advertisement-ah leh banner-a an tar angin ‘1st International Star Expo’ tiin tar ani a, hei hi Central Consumer Act 2019, Section 89 bawhchhiain misleading/false advertisement a ni a. Hei hi danin hremna a phut chu nuai tam tak chawi leh kum tam tak Jail tan theihna a ni.
- Food Safety Licence nei loin Delhi Kitchen tih hmangin ei leh in siam a ni a. He license hi ni 20.02.2021 a thi tawh a niin, kum 4 lai a thi tawh a ni. Hei pawh hi FSSAI dan kalh tlat ani.
- ILP an neih dan MZP leh MIMA ten ni 10.10.2025 khan he Expo hi a lo check tawh bawk a, he miah hian invalid ILP 36 lai man an ni a, police ah pek an ni.
Hetianga dan bawhchhiaa vawiin ni thlenga 1st International Star Expo Lammuala buatsaih hi tih tawp a la nih loh avangin MIMA leh MZP te chuan an ngaithiam lo hle a, heti chunga he expo hi hawn zel a niha buaina emaw, harsatna emaw an tawk a nih pawhin MIMA leh MZP chuan mawh an phur lo vang tih an sawi.
He expo hi a rang lama titawp tura ngenna Aizawl DC leh OC Aizawl Police Station-ah MIMA hruaitute chuan lehkha nimin khan an thehlut nghal a. Thuneitute hian a rang lama titawp turin MIMA chuan thuneitute a ngen nghal bawk.