Aizawl: ZPM party chuan MNF-in mipui tana harsatna siam zawnga total bandh huaihawt an rel chu pawi an tih thu leh Dampa bial by-election-ah an thatpui phah a rinawm loh thu an sawi.
Thawhtannia thuchhuah an siama an tar lan danin MNF-in Forest Conservation Amendment Act, 2023 adopt duh lohna lantir nan Mizoram pumah total bandh huaihawt an rel thlu ta mai chu mak an ti a, ngaihtuah nawn a, sut leh ngei turin an beisei.
“Total bandh hi Dampa bial by election boruak siam tumna mai niin kan hria a, vantlang harsatna thlen zawnga lungawi lohna lantir tuma an rorelna sangin thu an vaw thla ta mai hi pawi kan ti a, politics hamthatna lak tum rana boruak siam tumna a ni tih mipuiin an hriat chian em avangin, mipui zah vang tal pawhin thulh leh turin kan beisei a ni,” an ti.
FCAA, 2023 hi assembly, MNF MLA-te telna session-ah adopt a nih angin sawi nawi lova pawm ve mai turin an beisei tih tar lang bawkin, house-a resolution pass a nih dawn khan MNF MLA tumahin ‘Remti lo’ an ti lo a, lungrual taka pass a nih thu an sawi a. Hei hi forest clearance lak kawnga ramin harsatna a tawh thin a zangkhai zawk nana sorkar hmalakna a ni tih hi hlau lova pawm ngam turin an beisei an ti bawk.