Aizawl: India-a sorkar damdawi in tha bik tehnaah primary health centre (PHC) pahnih an tling thar leh a, Mizorama HWC-PHC 57 target awm zinga 36-in National Quality Assurance Standards (NQAS) certificate an nei tawh.
Dr. Lily Chhakchhuak, Mission Director, National Health Mission, Health & Family Welfare Department chuan India-a sorkar damdawi in tha bik tehna, NQAS-a tling thar Sialsuk PHC leh Suangpuilawn PHC te hian a tehnaah 90.06% leh 93.14% te an hmu tih a sawi a. Mizorama sorkar damdawi in 49-te chu NQAS national certificate nei tawh an ni a. Damdawi in 18 leh HWC Sub-Centre 21-in state level certificate nei mekin national certificate result nghak mek PHC pathum an awm bawk.
NQAS certified damdawi inte hi endikna chhawng thum paltlang an ni a, a tawp bera endikna an hmachhawn hi National External Assessment a ni a, state pawn atangin assessor an kal a. Hetah hian 70% an hmuh chuan certified an ni thin.
Certified tawh damdawi inte hi natna darh thei ven kawngah te, thawktu zawng zawngte an hna bil an thiamna te, an level zelah enkawlna an pek that dan te, a thlawna enkawlna leh damdawi pek te, damdawi in faina leh dik taka damdawi in bawlhhlawh sawngbawl te, hawihawmna leh a chhehvel vawnfai kawngah te, environment vawn yhat kawngah te endik an ni.
Health Minister Lalrinpuii chuan India-a damdawi in tha tehna a tling thei tura thawktu Dr. C. Lalhmangaiha, MO, Sialsuk PHC leh Dr. Lalrinsangi, MO, Suangpuilawn PHC leh an naute thawhrimna chu fakawm a tiin lawmthu a sawi a. NQAS certified damdawi in 49 neihte hi mipuiten tangkai taka an hman a duhsak a, mipuite pawhin tangkai taka hmang turin a chah bawk.