Nimin khan Lengpui airport a thlawhna tum tur zawng zawng thlawkchhuak tur tihkhawtlai ( delayed) vek a ni a. Lengpui a tum tur khualzin Kolkata, Delhi, Guwahati atanga lo lut turte chu airport-ah an awmkhawm nghuk mai a. Zing hma taka airport pan tawhte phei chuan an nghak rei hle. An thlawhchhuah tur leh tur loh hi chawhnu lamah a hriat chauh mai a. Khualzinte an lungawi lo takzet.
Thlawhna lo tum theih lohna chhan hi Civil Aviation Directorate, Airport Authority of India atanga tum phalna an pek hun chhung chu 13.10.2025 khan a tawp vang a ni. Hei hi a hmaa tih nun thar lehzel tur thuneituten an ngaihthah vanga thleng a ni. Kan airport neihchhun hi kan state sawrkar enkawl a ni a. Hetianga kan ram inkalpawhna pawimawhin ngaihthah a hlawh thei hi a mak hle. Tute nge he thilah hian mawhphurtu ni a, engvanga hetiang hi thleng nge a ni tih chu mipui zawhna a ni nghal a ni.
Airport chungchangah hian kan sawrkar hi a mualpho a ni ber a. Tunhma kum 20 chuang he airport hi hman a lo ni tawh a. Mipuite pawhin kan chhawr tangkai takzet. Damlo zin tur mangang tak tak, mi pawimawh veivak, zirlai etc hi he airport hmang tangkaitu chu kan ni. Covid hripui len lai pawhin damdawi lam mamawh tam tak airport kaltlanga la lutin kan tangkaipui tak zet a nih kha.
Kan sawrkar hian tuna thleng ang hi tun hnuah a thlen nawn tir leh a nih chuan mipui thinur hi a na hle thei a ni tih hria se. Thuneitu chu tu pawh ni rawh se, mipui harsatna chinfel hi chu kan sawrkar mawhphurhna liau liau a ni.