Aizawl: All NGO Mamit leh Commercial Vehicle Association, Mamit-in kawngpui chhia vangin Ningani atangin Mamit panna kawngpui tiamchin awm lova dan an tum.
Thawhtanni zana Siamliana Hall, Mamit-a All NGO Mamit leh Commercial Vehicle Association-te’n Joint Meeting an nei a. Mamit district chak lakna leh veivahna lirthei kawngpui pawimawh Mamit atanga Aizawl, Mamit atanga Bairabi leh Mamit atanga Zawlnuam inkar kawngpui lirthei eng chi tan pawh kal hleih theih loh khawpa a chhia chu a rang thei ang bera siam tura Mizoram sorkar an ngenna chu October 4-12, 2025 chung an ngaichang a, sorkar hmalakna mumal leh beisei anga hnathawh a awm lo tih an sawi.
Hetiang hi an dinhmun a nih avangin an kawngpuite chu sorkarin siam tha tura a taka hma a laksak hma chuan Ningani atangin heng kawngpui Mamit atanga Aizawl, Mamit atanga Bairahi leh Mamit atanga Zawlnuam te hi tiam chin awm loin eng lirthei mah kal tlang theih loh tura kawngpui dan chah ni se an ti.
Mamit district mipuite hetianga hma lak a ngai ta mai hi a pawi an tih thu an sawi a, kawng hrang hranga harsatna thleng thei lakah mipuite hriatthiamna leh thlawpna an ngen a ni.