November 15-25, 2025 inkarah Mizoramah a hmasa ber atan a thawh khat nan Territorial Army (Home & Hearth)-a tang turte lak an ni dawn a. A vawi khatna atan hmeichhiate tan an luh theihna tur a ni.
State Level Committee on Territorial Army Coordination & Establishment Chairman Lt. Col (Retd.) Clement Lalhmingthanga, MLA chuan Thawhtanni khan chanchinbumite kawmin Territorial Army (Home & hearth) lak tur chungchang a sawi fiah a. November 15-25, 2025 chhungin Rajiv Gandhi Stadium, Aizawlah lak tur a nih thu sawiin, he hna lakna hi Mizoram sorkar leh 166 INF BN (TA) (H&H) Assam-te tangkawp chuan an buaipui dawn tih a sawi a. A thawh khatnaah mi 144 General Duty lak turah post pakua chu hmechhiate tana hauhsak a nih thu a sawi.
Lt. Col (Retd.) Clement Lalhmingthanga chuan Mizo thalai hmeichhia leh mipaten a ram leilung fate an nihna anga hna zahawm, chhuanawm leh hmabak duhawm an ram tana thawh theihna hun remchang tak hawnsak an ni dawn tih sawiin, a vawi khatna leh a hmasa ber atan Mizo nulate Territorial Army-a an luh theihna tur kawng hawn a nih thu a sawi.
Territorial Army (Home & Hearth) hian thalai zam tha tak tak te, Indian Army uniform ha chunga an hma lam hun atana an inbuatsaih zel theihna tan hun remchang a siamsak tih sawiin Lt Col. (Retd.) Clement Lalhmingthanga chuan, “Territorial Army atana lakte chuan Indian Army uniform nen chhuanawm taka ram tana hnathawkin, India Army angin hlawh leh hamthatna bakah damdawia inenkawlna te an dawng a. An hnathawh that dan leh mamawh dan azirin Territorial Army hi hun rei zawk atana chhawr theih leh hamthatna hrang hrang sorkar ruahman anga pekzui zel tur an ni,” tiin, tunah hian India sorkar chuan 8th Central Pay Commission hmang turin a inbuatsaih mek thu leh, hei hian Territorial Army hlawh leh hamthatna pawh a belhchhah dawn tih a sawi.
Lt Col. (Retd.) Clement Lalhmingthanga chuan Territorial Army (Home & Hearth) Assam Mizoram ngeia din hian Mizoram venhimna atan a tangkai dawn bakah ram venghimtute leh Mizo mipuite inkarah inkungkaihna tithatu tur a nih dawn thu a sawi a. 166 Infantry Battalion (TA) (H&H) Assam chuan Mizoram sorkarin theihtawp chhuaha a thlawpna leh tanpuina zarah Territorial Army lakna hi langtlang, dik leh felfai taka kapui a, Mizo thalaite tan hna tha leh zahawm ram tana huaisen leh zahawm taka hna an thawh theihna tur hi zawmtir ngei hi a tum tlat tih a sawi bawk.