Mizo gospel progressive rock band ropui Drop Doubt chuan rimawi thar an nei ta, thawhlehni zan khan an rimawi thar hi an tichhuak a ni.
Drop Doubt hian September thla tir khan Aeris Records-ah record an ti tan a. Live vekin an record. September ni 27, 2025-a recording an tihzawh chu mixing leh mastering uluk taka an khawih hnuah, engkim an zo fel a ni.
An hla thar hi — Khawngaihna — tih a ni. An hla dangte ang bawkin an original tho a ni. He Mizo band-a member-te thlir pawhin original nei thei reng tur pawh an ni bawk.
Khawngaihna — hla hi rock ballad lam rawng a kai a ni a. Mizo rilrem tur ang chi-a siam a ni. Hla tluangtlam pangngai tak, mahse, thothang tha chi tak a ni a. A technical lam hawi zawng chuan tun tumah hian an hla hmasa dangte a pha lutuk lo deuhin a lang a, anni pawhin chutiang chu an tum ber a ni lem lo. Tun tumah hian an manager Joe Ralte hian part a pe nghe nghe.
Drop Doubt hian tuna an tihchhuah — Khawngaihna — music video hi an video tihchhuah hnuhnung ber khawihtu, RDS Shots bawk an hmang leh a ni.
MS-a (vocal), ZTPA Rokhum (guitar), Michael Rokhum (bass), John Tetea (drums) leh David Pachuau (Keyboard)-te awmna Drop Doubt hian kumin tir, January thlaa an music video — Hmangaihna — an tihchhuah hnua an single tihchhuah leh hmasak ber a ni.
Hetih lai hian music video an buaipui a, album lam erawh chu tumna em em an la nei rih lo. Tun tuma an music video buaipui chhan chu, “A bul berah chuan music kan tui em emna piah lamah, music thar tihchhuah zel hi a tha kan ti a. Chubakah, Pathian fak leh chawimawi kan duh vang a ni ber,” tiin Drop Doubt guitarist ZTP-a’n Thalai Times a hrilh.