Cyclone Montha chuan Thawhlehni zan khan Bay of Bengal atangin Andhra Pradesh vaukam, Kakinada bulah khawmual a kai a, ruah tam tak bakah darkar khata km 110 vela chak keng telin tuipui kam district a nuai a, thil chhia pawh a awm nual.
Montha hi Nilaini zingah chuan a chak tawh lo va; mahse, Andhra Pradesh leh Odisha-ah chuan chhiatna a thlen nual a ni.
India Meteorological Department (IMD) chuan Montha hi Machilipatnam leh Kalingapatnam inkarah Thawhlehni zan dar 07:00 velah khawmual a lut a. Thli darkar khata km 90–110 vela chak a keng a, a hnuah erawh a chakna a hloh zui tih an sawi.
Tual chhung chanchinbute chuan Andhra Pradesh-a Konaseema district-ah a chenna in thing tluin a delhah pitar a thi niin an tar lang a. Coconut kung tluin mipa naupang leh autorickshaw khalhtu a delh hliam bawk niin an sawi.
Andhra Pradesh sorkar chuan cyclone thawk tur avang hian mi 76,000 vel hmun himah a insawntir lawk a. Medical camp 219 siamin ran chaw tonne 865 nen a inring a. Sorkar hian hnawm then nan earthmover 1,447, drone 321 leh chainsaw 1,040 a chhawp sa bawk.
District pasarih – Krishna, Eluru, East and West Godavari, Kakinada, Dr BR Ambedkar Konaseema leh Alluri Sitarama Raju hmun thenkhatah mipuite him nan lirthei tlan pawh a khap bawk.
Cyclone Montha thawk vang hian Thawhlehni leh Nilaini tuk thleng khan veivahna a buai phah a. Visakhapatnam Airport-ah chuan thlawhna thlawk tur 32 thulhtir an ni a, Vijayawada-ah 16 leh Tirupati-ah pali thulhtir an ni bawk a. South Central Railway pawhin rel 120 zin tur thulhtirin East Coast Railway pawhin rel eng emaw zat zinkawng a thlaksak bawk.
Thuneitute chuan Andhra Pradesh-ah hian ram hectare nuai 1.38-a zauva horticulture thil chin leh hectare 38,000-a zauva lova thlai ding a tichhia niin an sawi a. IMD chuan hmun hliam deuh laia thlai hmunte chu a la chhiat belh thei dawn niin an la sawi lawk bawk.
Odisha pawhin Montha hi tuarin district 15-ah thli na tak leh ruah tam tak a thawk a. Chief Minister Mohan Charan Manjhi-a chuan mi 11,000 chuang cyclone shelter 2,048-ah sawn an ni tih a sawi a. District pakuaah sikul leh anganwadi centre chu Ningani thleng chawlh an puang.
Odisha-ah hian Malkangiri, Koraput, Rayagada, Gajapati leh Ganjam district-ah a sur tam zual a. Lung tla leh thing tluin hmun tam takah kawngpui dangin Gajapati district-ah in chimah mi pakhatin hliam a tuar bawk.
Odisha leh Andhra Pradesh-ah hian Nilaini pawh khan ruah a la sur chhunzawm a. IMD chuan Telangana, Tamil Nadu, Jharkhand leh West Bengal-ah Zirtawpni vel thleng hian ruah a la sur thei dawn tih an sawi lawk bawk.
Nilaini tukah khan IMD chuan Montha hian a chakna hlohvin cyclonic storm chauh a ni tawh a, deep depression-ah a chang zui thuai dawn tih an sawi.