Aizawl: Mizoram sorkar leh Mizoram Synod ten Mizoram Universal health Care Scheme (MUHCS) chungchangah thawhhona thuthlung, Memorandum of Agreement chu Thawhlehni khan an ziak.
Health Minister Lalrinpuii kaihhruaiin a pisa-ah Mizoram sorkar chuan, November 1, 2025 atanga Synod Hospital, Durtlang leh John Williams Hospital, Lungleia MUHCS hman a nih theih nan Mizoram Presbyterian Church Synod chu thawhhona thuthlung ‘Memorandum of Agreement (MoA)’ a ziahpui.
Memorandum of Agreement (MoA) ah hian Health & Family Welfare Department aiawhin Dr. Lalhriatzuali Ralte, CEO, Mizoram State Healthcare Society leh Mizoram Presbyterian Church Synod aiawhin Rev. R.C. Lalnghakliana, Moderator-ten an hming an ziak a ni.
He hunah hian Health & Family Welfare Department atangin Dr. Lalhriatzuali Ralte bakah Dr. R. Lalchhuanawma, Deputy CEO, Mizoram State Healthcare Society, Dr. C. Vanlalduhsaka, Medical Officer leh Lalzirtira, Informatics Officer te an tel a. Mizoram Presbyterian Church Synod atangin Moderator bakah Rev. VL Luaia Hranleh, Senior Executive Secretary, Rev. Dr. K. Lallawmzuala, Executive Secretary i/c Hospital, Upa Vanlalsawma Siakeng, Secretary (Sr) leh Rev. B. Zohmangaiha, Synod Secretary (Jr) te an tel a ni.