Union Minister of State Dr Jitendra Singh chuan Dampa bial by-election an ngaih thutak thu a sawi.
Zan khat riaka Mizoram tlawha zin Union Minister Dr Singh chuan BJP-in by-election an ngaih thutak hle tih sawiin hnehna chan ngei an tum avangin amah ngei pawh campaign beihpui thlaka Mizoramah a kal tih, Thawhlehnia BJP Mizoram party pisa-a thu thar thehdarhtute an kawmnaah a sawi.
Dr Singh chuan Dampa bial by-election-ah an candidate Lalhmingthanga thlan tlin a nih chuan November 14, 2025 atang chuan BJP hian thu an sawi ve mai mai lo tih an hmu dawn tih a sawiin, “Pu Modi sorkar hian state hmasawnna kawngah tumah a thliar hrang lo va; mahse, central hmasawnna scheme ataka a kal theih nan state leh central sorkar inkawp that a ngai a. Double engine sorkar kan neih a ngai a ni,” a ti.
Prime Minister Narendra Modi chuan hmarchhak state a ngai pawimawh tih sawiin, “Prime minister a a nih atangin vawi 70 dawn a tlawh tawh a, chu chu kum 10 kaltaa central minister-ten an tlawh aiin a tam zawk a. Chuvangin, hmarchhak state hi central hian a ngai pawimawhin Look East Policy chu Act East Policy-ah a chantir a ni,” a ti.
Dr Singh chuan central leh state-ah BJP sorkarna state-te chu an thang chak hle a, a chhan chu double engine sorkar an nih vang a nih thu a sawi a. BJP sorkar lohna state-ah chuan central hmasawnna scheme hrang hrang kalpui danah thawhhona tha leh scheme kalpui dan en zui that a ni thin lo va, PM Modi hmathlir anga Mizoramah pawh hmasawnna leh mipui hamthatna a thlen theih nan BJP a sorkar a ngai a, thenawm state Arunachal Pradesh leh Assam te chu BJP sorkarna a ni a, hmasawnna nasa tak a thleng mek tih a sawi bawk.